Health care bill pek nan cheng vbch.50 pechhuak

Sawrkarin health care bill a la pek lohte pekna atan cheng vaibelchhe 50 a pechhuak.
Finance changtu chief minister Lalduhoma sawi danin, health care bill atan sawrkar hmasa in cheng vaibelchhe 60 a dah atangin vbch. 35 a lo pechhuak hman a, an sawrkar veleh reilote chhungin a bak vbch.15 an semchhuah tir a, vbch.10 la bang leh SEDP atana dah an lak pen vbch.40 chu March 5 khan an pechhuak vek a, karleh lamah chuan damlote ipte a thlen theih tawh an ring tih a sawi.
SEDP sum an lakpek bik an tihfel har chhan sawiin, “Kan sawina a rei tawh aiin kan tifel har a, a chhan chu, reprovision ngai a ni. A tira hmanna tur kha thildang daih a ni a, damlo bill kan ngaipawimawh zawk ang, tiin kan thlak a, hemi tihfel chhung hi a rei deuh a, tunah chuan kan pechhuak thei ta,” a ti.
State sawrkarin health care system a hman mek chu an titawp dawn a, a tharin an thlak dawn tih chief minister hian sawiin, cashless vekin an ti dawn a, damlo tan pawisa ken a ngai dawn lo tih a sawi. Hemi atana sawrkar hmasa in ADB loan a lak chu kumin July velah inremna tihfel thei chauh a nih dawn avangin a hluia kal rih a la ngai ta tih a sawi a ni.
Golden card hman theih loh lai awm chungchang zawhnaah, central-in a kalphung a tidanglam a, chumi insiamrem chhung hman theih loh lai a lo awm tih a sawi a. Civil Hospital Aizawla damdawi man tlawm zawrhna chu sawrkar hmasa in a hlawk lo, tiin a lo titawp a, tuna Health minister hmalakna in tharthawh leha zawrh a ni leh tawh tih a sawi.