Health minister hluiin thu
dik famkim lo mipui a hrilh
– ZPM Thalai
Health care scheme chungchangah Health minister hlui Dr R Lalthangliana’n Asian Development Bank atanga loan puk phalna MNF sawrkarin tifel tawh nia a sawi chu thudik chanve a ni tih ZPM Thalai chuan an sawi a. Theihtawp chhuaha hma a lo lak tawhna tha an tihpui rualin, thudik famkim sawi thin turin thurawn an pe tih an sawi.
ZPM Thalai Hqrs. thuchhuak chuan, ADB atanga loan lak tumna hi MNF sawrkar lai, 2022 May 31 khan 128th Screening Committee of Department of Economics Affairs (DEA) chuan ngaihtuahin, NITI Ayog leh Ministry of Health & FW comment a lak hnuah 2022 June 14-ah Screening Committee chuan approval a pe a, hei hi loan lakna tura approval a ni lo tih Health minister hlui hi a hrilhhre nghal tih a sawi.
Screening Committee approval hmuh hnuah Fact Finding Mission neiin ADB hotuten Mizoramah tih ngai an rawn ti a. Loan approval pek hmain Independent Verification Agency tifel hmasa turin sawrkar an hriattir a. Loan lakna tura MNF sawrkar laia proposal siam chu grant fund tura tih ni mah se, sawrkar laipui policy-ah universal health coverage atan grant pek theihna a awm loh avangin proposal hi ennawn turin DEA hian ADB leh sawrkar a hriattir tih a sawi a ni.
ADB puihna in sawrkar chuan proposal siam ngai siamtharin, “Supporting Health Care Systyem Strengthening to Achieve Universal Health Coverage for Mizoram” tiin a hming pawh a thlak a; propposal thar DEA hnenah thawn leh a ni tih a sawi. Loan negotiation neih hmain NITI Ayog, Ministry of H&FW leh Department of Expenditure comment chu DEA hian a dil hmasa leh a, Ministry of H&FW leh NITI Ayog atanga zawhna awmte chhan ni bawkin, heng zawng zawng tihfel hnu hian loan negotiation leh loan signing a awm thei dawn chauh a, hei hi Mizoram sawrkarin ADB atanga loan a dil tirh phat atanga loan lak dan tur kalphung duansa a ni tih a sawi a ni.
‘Health minister Pi Lalrinpuii hmalakna in Mizoram Universal Health Care Scheme hi harsatna awm loa kalpui zel a ni a, MUHCS funding-na tur ADB-a loan dil chungchangah MNF sawrkar tihfel sa ZPM sawrkar chuan rin tur a hmu loa, theihtawp chhuaha hma thar la in, loan process dan kalphung pangngaiin hma lak mek a ni a, a hlawhtlin ngei pawh beisei a ni,’ ZPM Thalai thuchhuah chuan a ti.
Health minister hluiin thu dik famkim lo mipui a hrilh – ZPM Thalai
Get real time updates directly on you device, subscribe now.