Health minister-in raltlante tlawh

Health & Family Welfare minister Dr R Lalthangliana chuan Nilaini zing khan Aizawl chhuahlama Manipur atanga raltlante enkawlna hmun hrang hrang a tlawh a. H&FW Board vice chairman Dr ZR Thiamsanga MLA, Indian Medical Association, Indian Dental Association leh Mizoram Government Doctors’ Association leh Central YMA aiawhten an tawiawm.
Minister hian Thuampui YMA Hall-a raltlan awm mek te a tlawh a. YMA leh local council hotuten lo dawngsawngin an dinhmun an lo hrilh. Thuampui YMA Hall-ah hian chhungkua 20 awmin an vaiin mi 66 an ni a, naupang 20 an awm bawk. An zingah hian leader inruatin eirawng an inbawl a ni.
Tuirial Airfield-a raltlante enkawlna hmun Osborne Moral Reformation Centre a tlawhnaah raltlante enkawltu Tuirial YMA hruaituten an lo dawngsawng a. Raltlan 115 awmin chhungkaw 29 an ni a, naupang 70 an awm. An zinga naupang 7 hi primary school hnaivaiah luh tir an ni. Turiala raltlan awmte hi eirawng an inbawl chawp a, tui lamah harsatna an tawh avangin anmahni sum sengin tui an lei thin a, an zinga hna thawk thei mi 10 velin inhlawhna zawngin an chhuak thin. Fur khaw hnawng nen thosi a tam avangin thosilen an mamawh thu minister hnenah hian an lo thlen a ni.
Minister hian Berawtlanga raltlan enkawlna hmun pahnih tlawhin, Art & Culture Multipurpose Complex-a raltlante a kawm a, hetah hian mi 71 awmin an harsatna an lo thlen. Beraw Convention Centre-a raltlan hnuchham awmte a tlawh leh a, Zemabawk YMA leh Local Council hruaituten an lo dawngsawng. Convention Centre-ah hian DMM Children’s Home Churachanpur-a hnuchham naupang 28 leh anmahni enkawltu 5 an awm a ni. Home enkawltute chuan rinnaa Home enkawl an nih thu leh tumah behchhan an nih loh avangin harsatna an tawk tih an sawi a. Churachanpur-a an Home chu mi ram an luah hawh a nih avangin a neituten laklet an duh tawh a, haw leh pawh nise harsatna an tawk dawn tih an sawi a ni.
Raltlante enkawlna hmun a tlawhnaah mamawh zuala hman turin Rs 5000 theuh a hlan a, harsatna leh mamawh an thlente chu theih ang anga a bawhzui tur thu a hrilh. Zirlaite zirna an chhunzawm tir theih rih loh chhan ber nia an sawi chu, tuna an awmna hmunah hian an awm reng dawn loa an hriat avang leh an awmna tur mumal ruahman a la nih loh vangin an la hlauthawng deuh tih an sawi a ni.
Central YMA office-a Transit Camp a tlawhnaah Central YMA hruaitute nen inkawmin hmalakna tur an sawiho a, a tula hman atan Rs. 10000 a hlan.
“Kan unaute sahimna zawnga rawn tlanchhiate hi Mizoram sawrkar leh Mizoram mipuiin kan thlahthlam ngai dawn loa, kan tih theih chin chinah kan tang reng ang. An hriselna uluk taka vil turin hma kan la a, zirna kawnga an bahlah lohna’n ruahmanna kan siam mek a ni,” Dr R. Lalthangliana hian a ti.