Heart attack leh cardiac arrest- eng nge a danglamna?

Heart attack leh cardiac arrest- eng nge a danglamna?
Nimin lawkah India politician hriathlawh tak Sushma Swaraj chu cardiac arrest avangin a thi a nih kha, keini chuan lungphu chawl tiin kan sawi mai a, chanchinthar puangtu hrang hrang pawhin lungphu chawl tiin kan sawi mai a, heart attack leh cardiac arrest hi lungphu chawl tiin mi tam zawkin kan sawi ve ve mai thin. Mahse, heart attack leh cardiac arrest hi a inang lo deuh tlat mai a, tun tumah hian Times of India health section-in a danglamna ni a an sawi te kan rawn tarlang e.
Heart attack leh cardiac arrest danglamna hre tur chuan miin heart attack emaw cardiac arrest emaw a neih laia a taksa awmdan kan hriat phawt a ngai a ni.
Heart attack chu eng nge?
Heart attack chu coronary arteries-ah bolck awm vang a ni. Chu chu thisenzam kan cardiac muscle-a thisen supply-tu a ni. Kan lung (heart) hi tihrawl (muscle) a nih avangin, hnathawh nan oxygen pai tam thisen a mamawh. Tichuan lung-a oxygen pai tam thisen supply-tu thisenzam-ah block a awm chuan, lung tihrawl chuan hna a thawk thei ta lo va, a chawl ta thin. Chu coronary artery block chu hawn leh thuai a nih loh chuan lung tihrawl chu a thi tan ta thin a ni.
Heart attack hnuah engtin nge a awm?
Heart attack i neih chuan i awm bawr (chest) a na ang a, a tawt (tight) emaw, thil rit takin a delh/nem emaw angin i hria ang a, awmbawr chu in hmet sawr (squeeze) angin i hria ang. |henkhat chuan an taksa chunglam veilamah na an ti tel ang a, dar veilam leh ban veilam te a na ang. Heart attack-ah chuan cardiac arrest angin lung phu a chawl ve nghal mai lo.
Cardiac arrest chu eng nge?
Cardiac arrest chu lung phu a tawp vek vanga awm a ni. Lung-a electric kal dik lo vanga awm a ni ber a, chu chuan lungphu mumal lo (arrhythmia) a thlen thin. Hei hi heart attack leh cardiac arrest danglam chu a ni. Heart attack chu lung-a thisen supply-tu thisenzam block vang a ni a, thisen supply dawng lo mah se lungphu a tawp nghal lo, mahse, cardiac arrest chu lung-a electric kal dik lo (malfunction) vang a lungphu buai a ni a, lung phu a chawl thin.
Cardiac arrest hnu engtin nge a awm?
Lung phu a tawp avangin nikhaw hrelovin an awm a, an thaw lo va, an pulse a awm lo. Cardiac arrest-ah enkawlna an dawn vat loh chuan rei lote chhungin an thi mai thin.
Heart attack risk tisangtu chu:
1. Mi thau lutuk leh thau uchuak
2. Chhungkuaa lung lam natna nei awm te
3. BP sang
4. Zunthlum
5. Exercise la ngai lo
6. Awm awl leh ei tui/hmui hmer ei nasa
Cardiac arrest risk tisangtu chu:
1. Recreational drugs. Natna avanga damdawi kan hman ni lo, nawmsip bawlna leh taksa tihnawmna atana hman damdawi. |ip (cannabinoids), vaihlo (nicotine leh beta-carboline alkaloids), coca (cocaine), opium poppy (morphine, codeine leh opiates dangte), salvia divinorum (salvinorin A), khat (cathine leh cathinone), kava (kavalactones), nutmeg (myristicin).
2. Lung lam damdawi
3. Lung tihrawl tha lo
4. Lungphu mumal lo
Cardiac arrest risk tihhniam nan hunbi neia in-check-up leh heart screening neih thin tur a ni. Miin cardiac arrest a nei a nih chuan a nunna chhan nan rang taka chet a ngai. CPR (Cardiopulmonary resuscitation) tih nghal tur a ni a, keini ramah chuan emergency service koh mai tur te kan neih mumal loh avangin damdawi in hnai ber pan pui tur a ni a, damdawi in pan chhung pawhin CPR hi tih tur a ni.
Heart attack-ah chuan rang taka damdawi in pan pui tur a ni a, nikhawhre lova a awm a nih chuan CPR tih tur a ni.