Henry goal thun zat tluktu Mbappe
Henry goal thun zat tluktu Mbappe
Karliamta Zirtawpni World Cup qualifying Group D match pakhat zawka sihnih faia mualneitu Ukraine an hnehna inkhelah France captain Kylian Mbappe chuan goal khat thawhin, hun tawp hma minute riat chiah awm tawha Les Bleus goal hnuhnung zawk a tihluh hmang khan ram tana Arsenal legend Thierry Henry goal thun zat (51) a nihrualpui ve ta chiah.
Real Madrid forward Mbappe chuan kum 26 mi lek ni chunga Thierry Henry international goal khawl zat a tluk ve ta mai mak leh ropui a tih thu Mbappe hian inkhelh banah hahipin a sawi.
Indona avanga mikhual thleng thei lo Ukraine chuan an ram thenawm Poland-ah France hi an mikhual a; Tarczynski Arena-a mipui 38,973 chhuakkhawm hmaah Bayern Munich player Michael Olise chuan Didier Deschamps-a team hmahruaina goal khungin, he goal khat hi mikhual team-in an duhtawk thei mai dawna ngaih hnu hun tawp hnaih tawh lamah Mbappe chuan sihnih faia France chakna goal a rawn theh ve leh a; France hian US, Mexico leh Canada-te inthlentawm tur nakkum World Cup khel tur zawnna Group D match an khelh vawi khatnaah point thum an hlawhchhuak.
Les Blues tana chanchin lawmawm lo awmchhun chu half time laia a club team-mate Desire Doue thlaktu Paris St-Germain star Ousmane Dembele thlak ngaia minute 81-a a inhliam kha niin, a hmunruak luahtu Liverpool player Hugo Ekitike khan ram tana a debut a nghahchhuah phah ta a ni.
Ti chuan, France captain Kylian Mbappe kha player langsar ber ni lehin, kum 2017 maia a France ram tana a senior goal hmasaber thun ve chauh chungin tunah Arsenal legend Henry ram tana goal khung zat a nihrualpui ve ta reng mai a, a goal tihluh kha solo goal pui tak a ni nghe nghe.
Tun dinhmuna France tana goal khung hnem ber chu goal 57 khawl tling Arsenal leh Chelsea striker hlui Olivier Giroud niin, all-time France record ding lai tluk turin Mbappe hian goal ruk chiah a mamawh tawh.
Henry record a nihrualpui chungchan France captain chuan sawiin, “Titi (Henry) thlen chin ram kan han dai ve ta mai chu a ni a,” a ti zet a, chumi china duhtawk ngah mai a tum loh thu leh hmakhalh ngei a tum thu sawi chungin, “Henry-te ang player goal thun zat han tluk ve mai hi ka tan chawimawina a ni.
“Mi zawng zawngin French mipui tana Henry pawimawhna leh nihna kha an hre vek a, striker-te tana a chimchin phei chu a sang lehzual ngei ang a; kawng sialtu pakhat a ni a, ka zahin, ka ngaisang bawk,” a ti.
Henry kha kum 1998 World Cup an thlen tuma France squad player niin, khatih lai khan kum 20 mi lek a la ni a; Russia ramin kum 2018 World Cup a thlen tuma Les Bleus a champion-pui lai khan Mbappe chu rawlthar kum 19 mi lek a ni thung!
Henry leh Mbappe-te hian France tana goal khung hnem ber ni mek Giroud-a international match khelh zat (137) an pha lo ve ve a; Henry hi a career-a international game 123 khel chungin a chawl tawh a; Mbappe hian tam tan match 90 chauh a la khel a, Giroud khelh zat a khelh hun chuan engtiang taka tam ram tan goal khung ang maw?!
France hian Qatar rama 2022 World Cup-ah khan world champion an nihna humhim tum teh mah se final penalty shoot-out lamah Lionel Messi hoa inlan ARgentina an ngam lo a; kha final-a hat-trick siamtu Mbappe chuan a ram a champion nawnpui zo rih lo.
Nikum European Championship semi-final match pakhat zawka Spain an hneh loh hnu khan Giroud chuan international football a chawlhsan ve ta a, ram tana khelh tam leh goal khung tam kawnga Mbappe elpui lian ber hi a chawlh tawh miau avangin kum 26 mi hian France record ropui pahnih khum turin ‘chance’ a nei tha hlea ngaih a ni!
Chu mi chungchang chu sawichhuakin, “Record kan hnaih ve zel a, mahse, chu erawh ka lungkham ber a ni lo a, chu aia pawimawh zawk a awm.
“He mellung hmabak phun theih hi a chakawm a, a turu dawn hle bawk a, a chak pawh ka chak a, ka thlahlel a, chuti tur chuan theihtawp pawh ka chhuah chhunzawm zel dawn a, mahse, chu aia pawimawh zawk chu ka ram tana game hnehna chan zel leh title lak belh zel hi a ni,” a ti.