HEP-ah Mizoram leh J.S Sekhon thawk dun dawn Prepaid Smart Meter hman hun tur sawi thei lo

Power & Electricity minister R. Lalzirliana chuan, J.S Sekhon (A Sekhon Family under One World Energy Corporation USA)-in Mizorama Hydel Power Plant siam tura hmalak a duh thu Mizoram sawrkarah a thlen angin Tuivawl HEP 210 MW chu bawhzui tura hmalak mek a ni, a ti.
He thu hi niminah press conference kovin minister hian thuthar thehdarhtute hmaah a sawi a. G-20 Summit palai Mizorama lo tel J.S Sekhon chuan, Mizorama Hydel Power Project tihlawhtling tura hmalak dan tur “proposal” an siamte Mizoram sawrkarah a thlen tih sawiin, proposal an siam zinga pahnih chu Power & Electricity Department leh Finance Department ten zirchianna an neih hnuah bawhzui tlakah an ngai a ti a. An proposal anga hma la tura an hmachhawp te, a kalphungte zir hoa enfiah leh duang turin A Sekhon family a\angin Expert Team an lo kal thuai beisei a ni, a ti bawk.
Minister chuan Revamped Distribution Sector Scheme (RDSS) hmangin Mizoram pumah Prepaid smart meter hman a nih tur thu sawiin, Aizawl khaw chhung bikah hna thawh \an a nih tawh thu a sawi a. Smart meter hi nakum kum tir lama hman theih tura ruahman a nih laiin a thawktu contractor te an thiam tawk loh avangin a thawk thei tur company dang zawn an ngaih tur thu a sawi a. NESIDS Scheme atangin Sub-Station Chite cheng nuai 1048.99 senga siam mek chu nakum March thlaa zawh fel hman tura ruahman a nih thu sawiin, SASCI sum hmangin Sub-Station hrang hrang Lawngtlai, Marpara, Hnahthial to Haulawng, Tuirial to Baktawng leh Thingsulthliah te thawh mek a nih thu a sawi bawk.
R. Lalzirliana chuan kum 2019-2023 chhungin P&E department-in service connection 48,770 an pek thar thu sawiin, Mizoram pumah consumer 2,86,896 an awm mek, a ti a. Mizoramin power a mamawh san lai berin 159.12MW kan hman thu leh, mamawh hniam lai berin 45MW vel kan hman thu a sawi a. Mizoram state-in Tuirial HEP leh Vankal Solar huam lo in, power a thar chhuah chu 13MW a ni, a ti.
State dang a\anga power lei nan kum 2019-2023 thlengin cheng vaibelchhe 1835.39 hman a nih thu sawiin, power leina man pek loh avanga power cut off a la awm loh thu a sawi a. Kum 2022-23 inkara P&E department-in revenue a dawn chu cheng vbc. 741.34 a nih thu sawiin, department-in a enkawlna atana a senso zat chu cheng vbc. 945.15 a ni a. Power chhit man hi chawhrualin unit khat zelah cheng 7.94 a ni a, Mizoram khaw 725 zinga khaw 717-ah te electric a luh tawh thu a sawi bawk.
R. Lalzirliana chuan mipuiin electric bill an pek \hat thu leh electric bill lut a\angin phai a\anga kan leina man a daih loh nasat thu a sawi a. P&E Engineer-in-Chief chu cheng vbc. 3 thleng Finance department kaltlang kher loa pawisa pe chhuak thei tura thuneihna pek ni mah se, treasury a paltlang lawk theih thin loh avangin late fee chawi a ngaih thin thu a sawi a, kum 2019-2023 thlenga late fee an chawi belhkhawm chu cheng nuai 1514.30 a nih thu a sawi.
Mizoramin Solar energy hmanga power a siam chhuah chu 28.631 MW a nih mek thu sawiin, hmun hrang hrangah solar plant siam tura hmalak mek a nih thu a sawi a. Minister chuan kum nga chhungin Mizoram hmun hrang hrangah Distribution Transformer 625 an bun thar thu sawiin, Tlawva Small Hydel Project kawlphetha 5MW pe chhuak thei leh Kawlbem Small Hydel Project kawlphetha 4MW pe chhuak thei bakah Tlungvel Solar Power Plant (2MWp) leh Vankal Solar Plan (20MW) an hawng tih a sawi.