Heroin neitu kum 10 tang tur leh nuai 1 chawi turin ti

India ram danpuiin kawl leh zawrh a khap heroin tam tham tak a kawl avangin Myanmar lam mi pakhat chu court-in lung ina kum 10 tang tur leh cheng nuai khat chawi turin a hrem.
2021 February 25 chawhnu dar 3.22 khan Excise & Narcotics chuan an thudawn bawhzuiin Hnahthial district Ngharchhip atanga km.13 vela hla, Myanmar ramri Tiau lui bulah heroin gram 762 (hawng 63) a kawl vangin Bawinungchung (26) Leisen Myanmar chu an man a. ND&PS Act 1985 hnuaiah thubuai siam a ni.
He case hi Special Court (NDPS Act) Lunglei District Court judge F. Rohlupuia’n a ngaihtuah a. Prosecution lam atangin thuhretu pali leh defence lamah thuhretu pathum exam an ni a. Court dan anga thuhretute thusawi leh finfiahna hrang hrang enfiah a nih hnuah kumin July 12 khan thutlukna siamin thiamloh a chantir a, July 13 khan court hian a hremna hi a puang zui a ni.
Heroin neitu Bawinungchung hi Section 21(c) of NDPS Act 1985 hnuaiah thiamloh chantirin rim taka kum 10 chhung jail tang tur leh sumfai Rs. 1,00,000 chawi turin a ti. Sum chawi tur hi a neih loh chuan thla 10 dang jail tan belh turin a ti.