Heroin neitute jail tang turin hrem

Champhai leh Kolasib-a court chuan heroin kawl leh tawlhruk vanga thiam loh chantirte chu jail-a tang tur leh sumfai chawi turin an hrem.
Champhai Sistrict Special Court (ND&PS Act) chuan heroin tawlhruk thubuaiah Lalbeiseia (78) leh a fapa Lalnuntluanga (40), Champhai Vengsang ve ve chu thiam loh a chantir a, kum 10 chhung lung in tang turin a hrem.
2022 July 3 chawhnu dar 3.00 khan Champhai Police ten an ni pahnih hi an car atangin heroin hawng 22 an man sak a, thubuai siamin Champhai District Jail-a dahluh an ni. A hnu ah bail-a chhuah lailawk an ni a, bail-a a chhuah lai hian Lalnuntluanga zawk hi ruihhlo kaihhnawihah bawk man nawn a ni.
An chungthu ngaihtuahtu Special Court judge chuan thuhretute leh finfiahna awm theite a endik leh a ngaihthlak hnu ah, an pahnih hian thiam loh a chantir a. Chutihlaiin kum upa lam an nih tawh avang leh natna benvawn nei nia medical certificate an neih avangin hremna sang tak pe loin kum 10 chhung lung in tang tur leh cheng nuai khat ve ve chawi turin a hrem. Sum chawi tur hi an pe lo a nih chuan thla 6 dang lung in tan belh turin a ti a ni.
Kolasib Fast Track Court judge R Vanlalena chuan heroin gram 107-a rit neitu Lalthanthuami, Kolasib Khuangpuilama chu kum 5 lung in tang tur leh sumfai Rs. 30000 chawi turin a hrem ve bawk.
2020 August 11 khan Mamit Police thudawn danin Aizawl atanga Kolasib inkara tlan thin maxi cab pakhat chuan Mamit panin ruihhlo a phur niin an hria a. Mamit junction-ah an lo chang a, zan dar 8.30 velah maxi cab hian Mamit a thleng a, heroin neitu nia an thudawnna in a sawi hi a tel ve loh avangin police-te hian lirthei hi an chhuah a, a ruka enzuiin a tuk zing dar 3.30 velah Kolasib Venglaia HB Counter-ah a thil phurh a hlangthla tih an hria a ni. Hemi tuk zing dar 9 pelhah Wai Wai bawm chhunga dah, heroin hawng 8 chu nu pakhat, a neitu nia hriat chuan HB Counter atanga a lak laiin police hian an man a ni.
Fast Track Court judge R. Vanlalena chuan thuhretute thusawi leh a finfiahna dangte enfiaha a ngaihthlak bakah ukilte thusawi a ngaihthlak hnu ah, heroin neitua puh Lalthanthuami hi kum 5 lung in tang tur leh Rs. 30000 chawi turin a ti a. A sum chawi tur hi a pe lo a nih chuan thla hnih dang lung in tan belh turin a ti.