Heroin vanga mante ramdang mi leh state pawn lam mi tam

Heroin vanga mante ramdang
mi leh state pawn lam mi tam
April 1-3 inkar khan Mizoram Police chuan mi hrang hrang hnen atangin heroin an man a, an vai hian Myanmar mi leh Assam lam mi an ni. Tunhnaia Excise & Narcotics-in heroin tam tham tak an mansak pawh Manipur lam mi an ni.
April 3 chawhma dar 11.00 khan Chalbawia Junction Khankawn Police Check Gate-a duty-te chuan lirthei veivak an dapnaah car MZ-01 M 4159, a khalhtu Zothangpuia (34) Khawmawi Myanmar, tuna Zokhawthara cheng leh a mi phurh Hawiliankhupa (23) Tongpila Myanmar, tuna Melbuk Champhai district-a chengte chuanna an enfiah a, an rinhlelh angin lirtheiah hian heroin kg 1.860 (hawng 160) a rit an man a. He thil an chhuizuinaah Lalneihthanga (32) Chekan Myanmar, tuna Khawmawi Myanmar-a cheng mek leh Laltanpuia (36) Chekan Myanmar, tuna Zokhawthar a cheng mekte man belh an ni a. Champhai Police Station-ah thubuai ziahluh a ni.
April 1 zan dar 9.36 khan kea patrolling nei Zokhawthar Police chuan Zokhawthar Presbyterian biak in bula bike (Kenbo 125) pakhat chu rinhlelh thilthuah an tiding a, a hnunga chuang zawk chu thim thamah tlanchhe nghalin, a khalhtu zawk hi an chelh hman a. An rawksai ken an endiknaah heroin gram 247 a rit (hawng 21) an man. Bike khalhtu a hmuna man hi Vanlalchhuanga (30) Letpanchhawng Kalemyo district Myanmar, tuna Zokhawthara cheng mek tih hriat a ni a. Zokhawthar Police Station-ah thubuai ziahluh a ni.
April 1 zing dar 8.57 khan Chalbawia Junction Khankawn Police Check Gate-ah lirthei pakhat, Ford Titanium AS-11 M 5555 atangin heroin gram 231 (hawng 19) an man a. Lirthei hi Ashifur Rahman (28) khalh niin, a thurualpui Jamrul Hoque Khan (26) nen hian Karimganj Assam mi ve ve niin, Champhai atanga Karimganj pan tum an ni. Champhai PS-ah thubuai ziahluh a ni.
April 1 tlai dar 4.00 khan Champhai – Chhungte Junction ah Champhai Police chuan Kapsuankim (36) Tahan Myanmar (Khawmawi Myanmar a cheng) hnen atangin heroin gram 46 (hawng 4) an man bawk.