High Court-in MZU registrar chawlhtir

Gauhati High Court chuan Mizoram University-a registrar ni lai Prof Lalnundanga chu a nihna atangin a chawlhtir.The Aizawl Post thudawn danin, MZU registrar term hi kum 5 a ni a, Prof Lalnundanga hian kum 2019 atanga 2024 April 30 thleng (term khat) a chelh a; 2024 May 1 atanga MZU vice chancellor hna chelh tantu Prof. Dibakar Chandra Deka chuan, registrar hna hi chelh zawm lailawk turin a ti a ni.
Registrar post ruak hnawhkhana tur, employment notice tihchhuah a ni a, diltu zingah he post chelh lailawktu Prof Lalnundanga pawh a tel. 2024 October 23-ah interview neih a ni a, Prof Lalnundanga hi he hna chelh tura thlan niin, 2024 November 19 atangin a term hnihna hi ‘official’ in a chelh tan.
Interview neih zawh hnu ah registrar hna chelh lailawktu leh he hna dil vetu ni bawk Prof Lalnundanga hian Selection Committee inruat dan, external expert ruat ho thlengin a tir atangin a lo hre vek a, file kal vel pawh ama buaipui leh amah kaltlang a ni tih an hre ve chauh tih thudawnna chuan sawiin, he hna lak a nih dan chu fair lo leh thuneihna hmansualna a ni thei, tiin, court-ah 2024 December 13 khan an luhpui ta tih sawi a ni.
High Court-a luhpui a nih hnu hian hearing nei hleithei loin a awm reng a, 2026 May 27 khan hearing hi neiin, a thehluttute lam hian final disposal an dil nghal angin judge hian thutlukna a siam ta tih sawi a ni.
Gauhati High Court judge Kaushik Goswami chuan MZU registrar hna lak dan leh a kaihhnawihah hian registrar hna chelh lailawktu in he hna lakna tura kut a zen thuk lutuk chu ngaihthiam theih a ni lo, tiin a post chelh lai hi a tihtawp sak a ni.
Hemi chungchanga court judgement kimchang hi he chanchin buatsaih lai, May 28 chawhnu lam thleng khan hmuh tur a la awm loh avangin, court-in thu a rel dan kimchang hi hriat theih a la ni lo.