High jump pioneer Fosbury a thi

High jump pioneer Fosbury a thi
Mexico City khaw-puiin 1968 Olympic Games a thlen tuma Olympic high jump champion Dick Fos-bury chu kum 79 mi niin Pathianni khan a thi tih a agent Ray Schulte chuan Thawhtanni khan a puang.
High jump icon Fosbury hian Mexico City-ah khan tunlaia high jump an zuan dan – hnung zawnga hmawlh kham zuankhum dan hi a entir a, he tihdan (technique) hi ‘Fosbury Flop’ tiin a hming an phuah zui ta a, tun thlenga high jumper-te zuan dan a lo ni ta.
Chutiang taka high jump kalphung tidanglam dawrhtu thih thu puangin Schulte chuan Instagram lamah hetiang hian thu a hnutchhiah a, “Hun rei tak atanga ka thian leh thawhpuiin min kalsan ta tih hi thinlung lungchhe chunga puan a lo ngai ta a, thisen cancer a nih thu hriat a nih hnu lawkah Pathianni zing khan Dick Fosbury chu thlamuang takin a kal ta.
“Track and field legend hian a nupui Robin Tomasi leh a fapa Erich Fosbury bakah a fahrawn hmeichhe pahnih Stephanie Thomas-Phipps leh Kristin Thompson-te a kalsan,” tiin.
Straddle or scissor jump tih chu high jump zuan dan tlanglawn (common technique) ni thinin, infiammite tlaknat lohna’n awngphah dup (foam matting) phah a nih hnuah Fosbury hian khawvel huapah zuan dan chi thar (new technique) a rawn vawrhchhuak ta a ni.
He American hian gold medal a awrhna kawngah a hun laia Olympic record (2.24 metres) zuangin, high jump zuan dan kalphung chu kumkhua atan a rawn thlakdanglam ta nghal a, athlete tam berin hnungzang dawh zawnga zuan (back-first jump) an rawn uar ve ta zel a, khawvelin tihdan berah a pawm chho ta a ni.
International Olym-pic Committee presi-dent Thomas Bach chuan Dick Fosbury uina thu chhak-chhuakin, Olympic tihlutute zinga mi leh Olympic Movement an kal-puina kawnga an hmatheh fo thin a nih thu a sawi a, Olympic champion ropui chungchuang a nihna chu hriatreng tawh tur a nih thu a tarlang tel.
Team USA pawhin Twitter lamah ‘Fosbury Flop’ technique tichhuaktu Dick Fosbury chuan Mexico City 1968-ah Olympic gold a awrh satliah mai a ni lo a, high jump herdanglamtu Olympic pioneer leh legend a nih thu an tarlang.
World Athletics lam pawhin thuchhuah siamin uina thu an tichhuak ve nghal a; USA Track & Field CEO Max Siegel leh USATF Board Chair and High Performance Division Chair Michael Conley bakah France Minister of Sports and the Olympic and Paralympic Games Amelie Oudea-Castera pawhin he game atana Dick Fosbury hnathawh fakna leh ui thu an chhakchhuak bawk.
Fosbury hi Olympic-a a gold dawn leh high jump tana a thawhhlawk avangin National Track and Field Hall of Fame-ah ziahluh a ni.