HIL Auction-ah Harmanpreet man a to fal nalh
Mizo nula pathum hming a lang e!
Hockey India League (HIL) season thar khel tur player lilamna ni hmasaberah Pathianni khan Indian men’s hockey Olympic medal winning captain Harmanpreet Singh chu player man to ber niin, Soorma Hockey Club chuan cheng nuai 78-in an chhang a, league-a player man to ber a ni chho nghal.
Indian drag-flicker fak hlawh Harmanpreet hian India team tan a thawhhlawk a, national senior team tana game 234 a khelh tawh atangin goal 205 a thun tling tawh a, Hockey India League chanchina player man to ber a ni chho ta pawh hi a mak lo ang.
Indian forward Abhishek Nain chu player hlawh hnem ber tur pahnihna niin, Shrachi Rarh Bengal Tigers chuan Rs. 72 lakh-in an lei.
Women’s Hockey India League (HIL) auction lamah Mizo player pathum tehreng an lang!
Kan Mizo hockey player chhuanvawr forward Lalremsiami chu Shrachi Rarh Bengal Tigers-in cheng nuai 25-in an lalut a, HIL auction-a Mizo player man to ber a ni.
Forward vek Lalrinpuii Pachuau pawh Shrachi Rarh Bengal Tigers chuan cheng nuai hnihin an chhang a; defender Marina Lalramnghaki pawh Shrachi Rarh Bengal Tigers bawkin cheng nuai 10-in an senglut. Women’s HIL 2024-25 auction-ah hian hmun 86 awhkhat turin player 300 chuang phochhuah zinga 250 chu tualchhung player niin, a dang 70 chuang chu ram pawn lam mi an ni thung.
Kumin hi HIL-a women’s tournament an khelh vawikhatna tur niin, team pali an inel dawn a, team pahnih dang Resolute Sports leh BC Jindal Group enkawlte chuan a season hnihnaah an belhchhah dawn a ni.
Kumina hmeichhe team pali kan hmuh turte chu – Soorma Hockey Club (Haryana), Shrachi Rahr Bengal Tigers, Delhi SG Pipers leh Odisha Warriors-te an ni.
Kum sarih hnua HIL Auction an kalpuileh vawikhatna hi nimin khan a zo a; a ni hnihna Thawhtannia player man to ber chu Belgium midfielder Victor Wegnez niin, Harmanpreet changtu Soorma Hockey Club bawkin Rs. 40 lakh-in an chhang.
Ram pawn player dang pahnih Dutch ve ve Thierry Brinkman (Rs. 38 lakh) leh Arthur Van Doren (Rs. 32 lakh)-te manah Kalinga Lancers an inseng huai ngam a; Delhi SG Pipers chuan Tomas Domene manah Rs. 36 lakh phawrihin, Australian Aran Zalewski leina’n Kalinga Lancers chuan Rs. 27 lakh an seng bawk a; anni baka player man to leh chu Blake Govers mana Tamil Nadu Dragons-in Rs. 27 lakh an phawrh ngam kha a mi.
India player zingah Moriangthem Rabichandra (Rs. 32 lakh, Kalinga Lancers) leh Mohd Raheel Mouseen (Rs. 25 lakh, Tamil Nadu Dragons)-te chu man to dang an ni.
Mipa team pariatte hian Hockey Indian League season thar atan member 24 awmna squad an tifel a; player lilamnaa chhangtu nei player 192-te hiIndia national team player-te bakah tualchhunga talent nei tha bikte leh international player hraw zualte an ni.
Auction chhung hian player 1000 chuang duhthlan tura phochhuah an ni.
Hockey intihsiak lian leh player-te hlawh tamna HIL 2024-25 an tuaithar leh turah hian mipa team pariat leh hmeichhe team paruk an inlan dawn a; HIL 2017-ah khan Dabang Mumbai hnehtu Kalinga Lancers an champion a nih kha.
He league hi December ni 28 khian khelmual pahnih Marang Gomke Jaipal Singh Astroturf Hockey Stadium, Ranchi, Jharkhand leh Birsa Munda Hockey Stadium, Rourkela, Odisha-ah an tan dawn a ni.
Women’s league bik chu Ranchi khawpuiah January ni 26, 2025 khian an zo ang a; men’s final erawh Rourkela khawpuia khelh tur niin, a hun atan February ni 1, 2025 dah a ni.
HIL Auction-ah Harmanpreet man a to fal nalh Mizo nula pathum hming a lang e!
Get real time updates directly on you device, subscribe now.