Himachal-a lei minah mi paruk thi

Himachal-a lei minah mi paruk thi
Pathianni khan Himachal Pradesh-a Kullu-ah, Gurdwara Manikaran Sahib bula lei nasa tak min, thingkungte tawlh telin mi paruk a chhilh hlum a, mi pangain hliam an tuar bawk.
“Kullu-a Manikaran Gurudwara lirthei hunna bula lei minah thing tluin mi paruk a delh hlum a. District thuneitute hnuaia police leh rescue team chuan hliam tuar panga awmte chu Jari-a damdawi inah an dah nghal,” tiin Kullu Additional District Magistrate Ashwani Kumar chuan ANI a hrilh.
Kullu MLA Sunder Singh Thakur chuan, “Ruangte hi damdawi inah lak an ni a, hliam tuarte pawh lak an ni a. Police team leh thuneitute pawh a hmunah hian an awm a ni,” tiin ANI hnenah hian a sawi bawk.
Thlipui leh ruah nasa taka sur avangin gurudwara ep chiah ko chu thingte nen a tawlh a. A hnuaia kawngpui sira lirthei lo inhungte chu a delh a ni tih thuneituten PTI an hrilh ve bawk.
Damdawi thiam, police leh revenue thuneitute a hmunah thleng nghalin chhanchhuah leh chhawmdawl hna an enpui tih Kullu Sub Divisional Magistrate Vikas Shukla chuan a hmunah hian thuthar lakhawmtute a hrilh.
Chief Minister Sukhvinder Singh Sukhu leh Leader of Opposition Jai Ram Thakur te chuan chhiat tawkte an tawrhpui thu an sawi a. Chief minister hian district thuneitute chu a tuartu leh an chhungte puih theihna apianga pui turin a ti bawk.
March thla tir khan ruah tam tak leh vur tla nasain Himachal Pradesh hmun tam tak tibuaiin lei a min a, kawng a hnawh a. Kullu-ah pawh hian tuihawkin hnawl a hnawlte chuan lirthei tam tak a tichhe nghe nghe.
Tun hnai thova ruah sur nasa avanga Kangra district, Rokaru-a lei nasa taka minin lirthei eng emaw zat tichhiain chenna in 12 chu luah tlak lovin a lo siam tawh tih PTI chuan a tar lang.
In chhiaa chengte hi thuneituten hmun him zawkah sawnin a tihthat hna thawh mek a ni tih Kangra Deputy Commissioner Hem Raj chuan a sawi.
Palampur-ah pawh Shiva Hydropower siam hna thawh mekah mi pakhat a chin hriat loh a ni bawk a. Zawn hna ngawrh taka thawh mek a ni tih thuneituten an sawi.