Himachal-a lei minin bus a hnawlah mi 18 thi
Himachal Pradesh-a Bilaspur district-ah Thawhlehni zan khan lei minin mi mal bus a hnawla leiin a chhilh zui avangin mi 18 vel an thi a, mi pathum chhanchhuah an ni.
Bus-ah hian mi 30 atanga 35 vel chuangin Haryana-a Rohtak atanga Bilaspir bul, Ghumarwin pan niin ruah tam tak sur avangin an tlanna kawng chhak minin a delh ta a ni.
Prime Minister Narendra Modi-a chuan thite hi PM National Relief Fund atangin Rs. nuai hniha ral an nih tur thu leh hliam tuarte pawh Rs 50,000-a kan an nih tur thu a puang.
“Bilaspur, Himachal Pradesh-a chhiatna thleng chu a pawi ka ti tak zet a. A tuartu leh an chhungte ka ngaihtuah tak zet a, hliam tuarte pawh an dam leh thuai theih nan ka tawngtaipui reng a ni,” tiin PMO chuan thu a chhuah.
Chief Minister Sukhvinder Singh Sukhu-a pawhin chhiatna thleng chu pawi a tih thu a sawi a, chhanchhuah hna thawk thuai turin thuneitute a ti a. “Lei nasa taka minah mi mal bus hnawlin thi tam tak an awm a, a chhilh karah tam tak an la tang bawk a ni,” tiin X-ah a tar lang.
“Chhanchhuah hna chu rang taka thawh niin thuneitute hnenah pawh an mamawh ang hmanrua chhawpsak vek turin tih an ni,” a ti a, tual chhung thuneitute atangin chanchin thar a ngaihven reng tih a sawi bawk.
A hmuna video lak tihchhuahah chuan JCB khawl hmangin lei tlate hi then a ni a, mi eng emaw zatin mi tangte chhanchhuah tumin an bei tih a lang.
Tlang pum bus chungah hian a tla a, a chuangte tana dam chhuah theihna remchang a tlem hle niin police-in an sawi tih news agency PTI chuan a tar lang.
He chhiatna hi Jhandutta assembly bial huam chhung, Bhalughat-a Bhallu Bridge bula thleng a ni a. Bialtu MLA Jeet Ram Katwal-a chuan a hmu thleng nghalin chhanchhuah hna thawkte a enpui a. Naupang pathum chhanchhuah nia sawi a ni a, Bilaspur bula Berthin damdawi inah lak an ni.
Union Home Minister Amit Shah pawhin chhiatna thleng pawi a tih thu a sawi rualin National Disaster Response Force (NDRF) team-ten chhanchhuah hna an thawh nghal mek thu a sawi.
President Droupadi Murmu-i pawhin pawi a tih thu leh a tuartu chhungte a tawrhpui tih a sawi a, hliam tuarte pawh dam leh thuai turin a tawngtaipui tih a sawi.
Bilaspur-ah hian Thawhtanni atang khan ruah a sur deuh reng a ni.