Hamas-in Trump-a rawtna pawm, phut erawh la nei

Hamas-in Trump-a rawtna pawm, phut erawh la nei
Hamas chuan US President Donald Trump-a’n a ruahman anga Gaza-a indona chu tihtawp an duh tih Thawhlehni khan an sawi a. Hetih rual hian thil phut erawh an la nei a, hei hian Israel nena Egypt-a an inbiak mekna chu a harsain hun a la duh rei hmel niin a tilang.
Trump-a hian kar kal ta Thawhlehni khan rawtna thar puangin US team chu inbiaknaah hian an tel zui bawk.
Hamas hotu lawk pakhat, Fawzi Barhoum-a chuan Palestinian hel pawlin Israel beia Gaza indona a chhuah tan phahna kum hnihna a thlenah an pawl dinna hi a sawi chhuak a. Sharm el-Sheikh, Egypt-ah muanna a awm theih nan an indawr mek.
October 7, 2023-a Hamas-in Israel an beih khan mi 1,200 vel thatin hren turin mi 251 an la bawk a, hei hi indona tichhuaktu niin Palestinian sang tel thi tawhin Gaza Strip pawh a chhe nasa tawh hle.
Thuneitute chuan inremna a awm thuai an beisei a, hetih lai hian Israeli-te chuan Holocaust hnua ni khata an thisen a chhuah tam ber ni champha an hmang a. Gazan-te chuan kum hnih indona a tawp thuai an beisei mek bawk.
Barhoum-a chuan TV-a thu a sawinaah, “Hamas aiawhte hi harsatna hrang hrang paltlanga Gaza-a kan mite duh anga inremna a awm theih nan Egypt-a inbiaknaah an tel mek,” a ti.
Inremna chu indona tihtawpna tur leh Gaza Strip atanga Israeli-te an insawn chhuahna a ni ngei tur a nih thu a sawi a, hei hi Israel-in a pawm ngai loh a ni a. Israel pawh hian Hamas-te hi an ralthuam an dah an duh a, anni hian an duh lo ve bawk.
Hamas hian inkahhai nghet neiha Israeli sipaite an chhuah vek leh Palestinian-te tana rorelna dinga an tel ve an duh niin Barhoum-a chuan a sawi.
Israeli Prime Minister Benjamin Netanyahu-a chuan inbiakna kal mek chungchangah hian engmah sawi a la nei lo.
US thuneitute chuan indona tihtawp leh mi hrente chhuaha Israel-a Palestinian lung in tangte chhuahna tur an ngai pawimawh hmasa ber tih an sawi a. Inbiakna tel, Qatar chuan eng inremna nge chhuak dawn tih sawi theih a la awm lo tih a sawi ve thung.
Inkahhai a awm loh chuan Israel hian na takin Gaza a beih chhunzawm dawn a, hei hi khawvelin a ensanna tur tling a ni mek.
Gaza-a Israel chet dan duh lohna hi Sydney, Australia leh European khawpui hrang hrangah lantir mek a ni hlawm.
Indo chhuah tan ni champha, Thawhlehni khan Israeli tam tak chuan thil thlenna hmun an tlawh hlawm.
Israeli-te chuan Sharm el-Sheikh-a inbiakna hian Gaza-a la hren mek mi 48-te chu an chhuah theih phah ngei an beisei a, la hren zinga 20-te chu an la dam nia hriat an ni.