hina-ah kum 18 hnuailamin ni khatah phone atangin internet darkar 2 chiah khawih thei tawh dawn

China-a cyberspace lama thuneitute chuan naupang, kum 18 hnuailam te chu nikhat an smartphone atanga internet an khawih theihna hun darkar hnih chiah hawn sak an nih tawh tur thu an puang a, naupang kum 16 hnuailam te chuan darkar khat chiah internet an khawih thei ang a, kum riat hnuailam phei chuan minute riat chiah an khawih thei ang.
Cyberspace Administration of China (CAC) chuan smartphone siamtu te chuan phone siamah minor mode program dah tel vek tawh turin a ti a, hei hian kum 18 hnuailam te chu an mobile phone atanga internet an khawih theih hun pawh zan dar 10 atanga zing dar 6 thleng a titawp vek thei dawn a ni.
Kum 16 leh 18 inkar te chuan nikhatah an smartphone atangin internet darkar 2 an khaih thei ang a, kum 8 leh 16 inkar te chuan darkar khat, kum riat hnuailam tan chuan minute riat chiah an khawih thei tawh dawn a ni. Mahse, CAC chuan smartphone siamtute chu he inkaihhruaina, naupang tana phone atanga internet khawih theih hun chhung hi an nu leh pa te hriatpuina leh phalnaa tihdanglam sak a phal dawn thung a ni.
Tunhnaiah kum lama naupang zawk te zingah myopia (thil hmu phe ti mai ila) leh internet addcition rate a pun nasat avangin thuneitu ten hmalak dan tur an ngaihtuah a, 2021 khan China sorkar chuan kum 18 hnuailam video game khelh curfew te pawh a lo puang tawh a, video-sharing platform hrang hrang Bilibili, Kuaishou leh ByteDance te pawhin 2019 atangin ‘teenage mode’ an lo dah tawh a, hei hian tleirawl ten an platform an hman rei theih zawng an ruahman sak a, ByteDance hnuaia mi TikTok ang deuh app Douyin chuan tleirawl te chu ni khatah an app minute 40 chauh an hman theihna tur ‘teenage mode’ hi an hmang nghe nghe a ni.