Hindu-te Muslim-ah an inlet zawk : Nabi Azad

DPAP chairman Ghulam Nabi Azad chuan Indian Muslim tam berte chu Hinduism atanga inlette an ni tia sawiin example atana tha ber chu Kashmir Valley niin Kashmiri Pandits tam ber te chu Islam-a inlet an ni tiin a sawi.
Politics a hamthatna chan nan sakhuana hman tur a ni lo tia sawiin Azad chuan tute pawh sakhua behchhana politics khelte chu mi chak lo an ni tiin a sawi bawk.
“BJP leader thenkhat ten Muslim thenkhatte chu pawn lam atanga lokal leh chhunga awmsa an ti a. Tute mah hi pawn lam leh chhung lam atanga lokal an awm lo. Islam hi kum 1,500 vel kalta atanga intan a ni a. Hindu sakhua hi a upa hle a. Muslim 10-20 vel te chu pawn lama kal te pawh an awm mahna a, a thente chu Mughal army te pawh an ni” tiin Democratic Progressive Azad Party (DPAP) chief chuan a sawi a.
“Muslim dang zawngte chu India rama Hinduism atanga inlette vek an ni zawk. Chu chu Kashmir-ah fiah takin a lang a. Kum 600 kalta vela Kashmir-a Muslim ni tawh te an vaiin Kashmiri Pandits te vek chu Islam-ah an inlet a ni. Hindu sakhuaa piang vek zawk an ni” tiin Jammu and Kashmir chief minister hlui chuan a sawi bawk a.
Azad chuan Hindu te an thih chuan an ruang halin a awm a ti a, “Hmun hrang hrangah halin an awm a, an vap te chu tui nena inchiahpiah turin lui hrang hrangah thehdarh niin chu tui chu kan in a ni,” tiin a sawi bawk a. “An ruang halna vap nena inpawlh tui te chu kan in a ni” tiin DPAP leader chuan a sawi bawk a.
Chutiang bawk chuan Muslim te tisa leh ruh te chu he ram leiah hian a chang a ni tiin Azad chuan a sawi bawk a. “Anni pawh he rama tel an ni a. An tisa leh ruh te chu Bharat Mata leiah a chang a ni. He ramah hian Hindus leh Muslims te an chhuak ve ve a. Eng nge an pahniha danglamna chu?” tiin a sawi bawk.
Sakhuana hmanga vote lak tumna chu selin Azad chuan, “Sakhuana hmanga inhumhim tumna politics chu a chak lo a ni. Sakhuana hi politics ah vote bank a hman tum chi a ni lo. Hindu leh Muslim hmanga vote zawn tur a ni lo,” tiin a sawi bawk.