James Miahlung
-- Advertisement --
India dan puia Jammu & Kashmir (J&K)inhungbingna(Special status) lo irh chhuahna Article 370 thiah chungchang chu kum li chuang Supreme court(SC) ah a inchiah hnuin ni 11 December 2023 khan thuremna tihchhuah a ni a. Sawrkar laipuiin ni 5 leh ni 6, August 2019 a Presidential orders CO(The Constitution(Application to Jammu and Kashmir)Order 272 leh 273 hmanga article 370 thiata J&K Union Territory pahniha a then chu SC hian dik tiin a nemnghet a ni.
Article 370 thiahna order khingtute hian article 370 chu J&K constituent assembly-in a rawt a nih loh chuan thiah theih a ni lova, J&K-in India a zawm hnuah J&K constituent assembly pawh thiah zui a nih tak avang leh article 370 thiah theihna dan (Provision)a awm tawh loh avangin article 370 chu provision duan lailawk (Temporary) ni tawh lovin kumkhuaa awm reng tawh tur (Parmanent) a ni tiin tang mahse SC chuan article 370 chu hun rei lote atan chauh a duan(Interim arrangement)niin J&K constituent assembly a awm tawh loh chinah leh J&K in ama pualin danpui a nei hnuah chuan article 370 hi a awm reng tulna awm tawh lova President-in engtik lai pawhin a thiat theih a ni tiin sawrkar laipui thil tih dan chu a pawmpui a ni.
J&K special status nuai bo hi Hindutva pawl hrang hrangten hun rei tak atangin an lo auchhuahpui tawh thin a, ni 5 August 2019 a article 370 thiah a nih kha mi tam tak chuan Hindutva tan hnehna(Triumph of Hindutva)angah an ngaih a ni. Indian express(12.12.23)ah Deeptiman Tiwary in a ziah danin Hindu Mahasaba hruaitu hlun leh Bharatiya Jana Sangh(BJS) dintu Dr. Shyama Prasad Mukherjee chuan 1952 leh 1953 khan article 370 thiah a ni theih nan Hindu sakhaw zuitu tamna North India state te fang kualin hmun hrang hrangah public meeting a buatsaih a, a au hla pakhat, “Nahin challenge, ek desh mein do vidhan, do Pradhan aur do Nishan” (Ram pakhatah dan pui pahnih, prime minister pahnih leh flag pahnih in nei thei lo ang) tih chu a hnua J&K special status dodaltu pawl hrang hrangte chawkphurtu a lo ni ta a. Dr. SP. Mukherjee hi 1953 ah Srinagar a tlawh laiin police-in manin tan inah khung a ni a, a hnuah hrisel lohna avangin a boral zui ta a ni. SC thuremna chhuah tuk ni 12 December 2023 ah Prime Minister(PM) Narendra Modi-a’n Indian Express-ah article ziak in, PM hian a article ah J&K inhungbingna hlih a nih theihna tura Dr. SP. Mukherjee inpekna a sawilang ve nghe nghe a ni.
Hindutva pawlte zingah article 370 leh J&K special status ngaimawh bertu leh a tir atanga article 370 dodalna agenda a nei ngar ngartu chu RSS a ni. RSS ngaihdanah chuan article 370 chu Bharat atanga Kashmir inlakhran tirtu leh India ram kehdarh tir theitu niin J&K special status nuai bo chu an pawl thil tum ber lian ber te zing ami a ni. A vawikhat nan RSS hian 1953 khan Bharat-ah J&K a inchhunfin pumhlum (Complete merger)theihna atan resolution a pass a, 1964 ah RSS thuneitu sang Akhil Bharatiya Pratinidhi Sabha(ABPS) chuan article 370 thiah leh J&K UT pahniha then duhna resolution a pass leh a, a hnu 1984 leh 1986-ah article 370 chu Punjab leh Mizorama helna chawkphurtu nia ngai in RSS hian thiah ngiatna resolution a lo pass leh tawh bawk a ni.
BJS atanga BJP a lo pian hnuin kum 1989 inthlanah a vawikhat nan BJP manifesto-ah article 370 thiah chungchang a lang a, 1999 leh 2004 manifesto-ah Kashmir kaihhnawih sawi lan ni lo mah se, 2009 atang chuan BJP manifesto-ah article 370 hi telh chho leh char char a ni. SC-in article 370 khinna chungchang thuremna a tihchhuah hnuin Hindutva core agenda pathum zinga pahnih Ayodhya-a Ram temple sak leh article 370 chu a hlawhtling ta a. Agenda dang Uniform Civil Code(UCC) pawh hi BJP sawrkarna state te chuan tihhlawhtlin an duh thu an sawi hlawm a, Uttarakhand phei chuan SC judge hlui kaihhruaina hnuaiah committee dinin January 2024 ah chuan tihpuitlin hman tumin an inbuatsaih mek a ni. Nakum inthlan puiah tun anga BJP-in MP a ngah a nih chuan UCC pawh hi Parliament-ah awlsam takin an pass leh mai a rinawm.
J&K special status nuai bo chungchangah thu inchuh leh inhnialna tam tak kara thil chhinchhiahtlak tak chu harsatna hrang hrang karah kum 70 hnuah Hindutva agenda pawimawh berte zinga mi tihhlawhtlin a ni ta hi a ni. Tin, tun tuma SC-in article 370 thiah leh J&K state UT pahniha then a pawmpui hian central sawrkar leh state sawrkarte thuneihna insem zai dan kalphung (Federal system)ah centre sawrkar chungnung zawkna(Entirnan, article 3 hnuaia Parliament-in state ramri a tihdanglam theihna) a rawn nemnghet tel angah a ngaih theih bawk a ni.