HIV/AIDS: A break a fail ta em ni?

Aizawl district huam chhunga AIDS Prevention and Control Committee tunhnaia thutkhawmah, thla 5 kalta chhung khan Aizawl district-ah thisen test 18,616 atangin HIV positive 467 hmuhchhuah a nih thu report a ni a. HIV positive hi kum 25-35 inkar an tam ber a, kum 14 hnuai lam pawh mi 7 an awm. HIV kaina chhan ber hi inpawlna (heterosexual-76.3%; homosexual/bisexual- 6.4%) a ni a; a bak 11.3% hi inchiuna hriau inhmantawm leh nu leh pa atanga kai te an ni.
Report atanga a lan danah hian, thalai kum 25-35 inkarah sex a hluar hle tih a hriat theih nghal a. Condom hmang uar tura nasa taka infuihna karah, hetiang result tha lo tak mai hmuh tur a awm leh si a nih chuan, condom awareness hian a thawk nep hle tihna a ni thei mai ang em(?) tih chu zawhna awm thei a ni.
Tun hnai thla nga chhung Aizawl district-a HIV/AIDS report atanga kan hmuh theih chu—chawhrualin ni tin HIV+ve mi 3 (3.1) zel hmuhchhuah ang a ni a, thisen test atanga HIV+ve hmuhchhuah chu 2.5% a ni bawk.
August thlaa health minister-in HIV/AIDS chungchanga Mizoram dinhmun a tarlanah khan, kum 2020 atanga July 2025 thlenga HIV/AIDS thihpui mi 2,996 an tling tawh a, hemi hun chhung veka HIV+ve hmuhchhuah pawh 11,032 a ni bawk.
Mizorama HIV/AIDS case awm tan kha 1990 a ni a, kum 35 a liam ve ta. Record hriat theih chinah, kumin February thleng khan HIV/AIDS avanga thi zat hi 5,332 an tling tawh a. Kan data neih atanga lo lang ta chu, kum 30 chhunga HIV/AIDS vanga thi aiin tun hnai kum 5 chhunga HIV/AIDS vanga thi hi an tam zawk daih tawh, tih a ni.
HIV/AIDS dona kawngah hian Mizoram hian tha leh zung, sum leh pai kan thawh chhuak nasa tawh a, a break hi kan rap ngar ngar thin; mahse, tunah zet chuan a break fail ang maiin tun kum nga chhung hian kan lim puat puat chu a ni ta ber a. HIV/AIDS do nana hmanrua chi hrang hrang kan hman ang hi state dangte pawhin an hmang ve vek a, an sawtpui thei a, keini erawh hma lam panin kan la vung hlerh hlerh reng mai si!
Ngunthluk taka inenfiah hi chu kan mamawh ta hle a ni. ‘Mimal zalenna’ palzut chuang si lova inkhuahkhirh deuh te, kan social life/religious activities her rem deuh te hi, a tul tawh a ni mai lo maw?