HIV/AIDS vanga thi 5021

tate AIDS Control Society chhinchiah danin Mizoramah HIV/AIDS vanga nunna chan mi 5021 an awm tawh a; puitling zingah HIV kai theih mai na ‘chance’ nei sang zingah Mizoram chu India ramah a sang fal nia sawi a ni bawk.
Mizoram State Council on AIDS chu an chairman, chief minister Lalduhoma hoin Thawhtanni khan an thukhawm a. Report danin, MSACS chhinchhiahnaah HIV kai zingah an damdawi – ART ei mek 16217 an awm a, an zinga 500 vel chu state pawn lam mi an ni. HIV kai hmuh chhuah zingah ART ei duh lo, chhuizui theih loh 633 awmin, HIV vanga nunna chan 5021 an awm tawh.
National AIDS Control Organization (NACO) hnuaia estimate lam thiamten kum 2023 a Mizoram dinhmun an chhut danin, puitling zinga zaa 2.73 chu HIV kai thei dinhmuna ding niin an ngai a. Hei hi India ramah a sang fal hle a, national level chu zaa 0.2 a ni. Mizoram prevalence rate a san chhan hi, HIV kai hmuhchhuah tam vanglai (peak level) a thlen tlai bik vanga ngaih a ni.
Kum 2017 khan Mizoram peak level hi a thleng chauha ngaih a ni a, HIV kai nei tam state dang chuan kum 2005 chhoah khan an peak level an lo thleng tawh tih sawi a ni. Mizoramin hmuhchhuah san lai ber (peak level) a thlen hnu hian kai thar hmuhchhuah zat hi a tlahniam zui ve hret hret tih sawi a ni bawk.
MSACS hotute sawi danin, HIV kai nuten nau an paiin an naute chu HIV laka venhim theih a ni a. Hetianga HIV inkaichhawn hi tihbo hmiah tumin tan an la mek. Nikum chhung khan HIV kai nu nau hring 120 atangin nautea kai zui ta pahnih chauh an awm a. He hmalakna hi a hlawhtlin theih nan nu naupaite dinhmun rang taka hriat a ngai thung tih an sawi.