Kawng chhia siamthat phutin Vairengte kawng dang dawn
Kawng chhia siamthat phutin lirtheia eizawng pawl intelkhawm chuan August 22 atang hian Mizoram chak lakna pahnih – Vairengte leh Bairabi atanga lirthei lut tur an dang dawn.Kolasib district-a lirtheia eizawngtu pawl paruk intelkhawm chuan an district huamchhunga Mizoram chak lakna, Vairengte leh Sairang inkar leh Bairabi – Kolasib inkar national higway-ah lirtheia eizawngte leh zirlaite thlenga harsatna thlen khawpa a chhia chu pawi an tih thu an sawi a. Kumin fur thlen hma khan he harsatna hi a thlen loh nan Kolasib district bawrhsap hoin lirtheia eizawngtute leh tlawngai pawlten ruahmanna siamin, he kawng enkawltu NHIDCL leh an hnuaia contractor-te pawh vawi tam an ngen tih an sawi a ni.
Heti chunga lirthei zawh ngam loh khawpa chhiaa an chhuah tak avangin lirthei eng chi tan pawh zawh ngam theiha kawngpui tha an neih thuai theih nan August 22 chawhma dar 10.00 atangin tiamchin awm loin Kolasib district huamchhunga national highway chu lirthei eng chi mahin zawh lo turin an dang dawn tih an sawi.
Mizoram pawn atanga lirthei rawn lut turte pawhin hei hi zawmsak turin an ngen tih an sawi a. An ngenna ngaipawimawh loa tlan lui an awm a nih chuan an chungah eng harsatna pawh thleng se, anmahni cho chhuahah an ngai dawn tih an sawi a ni.
Lirtheia eizawng pawl chuan kawngpui siamtha tura state PWD minister leh Kolasib bialtu MLA, state deputy speaker ngenna pawh zahlo tu NHIDCL leh an hnuaia contractor-te chu 2024 August ral hma ngeia Kolasib district atanga inlachhuak tur leh, an aiawh atan hna thawk thei ngei contractor dah turin Mizoram sawrkar an ngen tih an sawi a. An hmalakna chu lirthei neitute leh lirthei eizawng bakah mipuiin thlawp turin an ngen tih an sawi. He thil hi politics-a inchirhthehna atan political party te an ngen nghal bawk a ni.
Lirthei dan an tumnaah hian dan leh thupek kengkawhtute, damdawi lam kaihhnawiha thawktute, zirlai ho hruaitute, P&E leh PHE thawktute, press mite leh bawnghnute sem bakah damlohna leh chhiat tawhna avanga kal ngai, an awmna YMA branch president/ secretary hriatpui lehkha neite chu a huam dawn lo tih an sawi a ni.