Hla Kungpui Mualah mi thar paruk
‘Mi chuan Poets Square an nei a, Zofate chuan Hla Kungpui Mual kan nei,’ tiin pa titi thiamte’n sawi ta se, a thiante’n lu an lo bu nghat nghat ngei ang. Hla Kungpui Mual chu Mizo writer-te chawimawina hmun a ni.
He Hla Kungpui Mualah hian kuminah mi paruk seng luh belh an ni a, tihian he hmunah hian writer 42-te chawimawina leh hriat rengna lung a ding ta.
Khawbungah Mizo Hla Kungpui Mual a awm a, YMA hnuaiah Mizo Hla Kungpui Mual Committee a awm. Anni hian an enkawl a, Mizo writer hmingthang, mual liam tate hriat rengna lung an phun thin.
1986-ah an din a, Patea leh Damhauhva te lung phunin bul an tan. Kum 10 hnuah an belh thin a, 1996 leh 2006-ahte an belh hnuah, 2011 kha a kum 25-na a nih avangin, kum 10 hmain an belh a, 2016-ah leh 2026-ah an belh leh. Kumin hi a kum 10-na a ni.
Kumina an seng luh tharte hi Hrawva (1893-1956), Lalmama (1901-1959), Rev Dr Zairema (1917-2008), Capt LZ Sailo (1924-2008), Khawlkungi (1927-2015) leh Lalhmingliana Saiawi (1937-2016) te an ni.
April ni 8 khan seng luh tharte pual hian Khawbung Vengpui Kohhran Centenary Hall- international seminar huaihawt a ni a, Khawbung mi parukte kutchhuak hi an zir. Zanah lengkhawm hlain an intihsiak a, Khawbunga veng hrang hrangte leh an khawchhuak hmun dang atanga hawte group parukah inthenin an intihsiak a ni.
Ningani-ah an chhunzawm a, Hla Kungpui Mual-ah hian seng luh tharte seng luhna hun an hmang. Mipui huapin ruai an theh a, zanah Ruby Jubilee Concert an nei bawk.
A huaihawttute hnen atanga thu dawn danin, hriat theih chinah mikhual 400-500 vel an awm a, Mizoram hmun hrang hrang atanga an kal bakah Myanmar atang pawhin an kal. Mikhualah hian chanvo nei chu tlem azawng an awm a, a tam zawk fe chu chanvo pawh nei lo, he hun ngaih pawimawh vanga tel an ni.
Mizo Hla Kungpui Mual hi ram hectare 3 vela zau a ni a, khawtlangin hemi atana an pek niin, thing awm sa a that bakah thing an phun belh teuh bawk. Nauban a tam a, Mizote nauban chi hrang hrang a kimah an ngai.
‘Hla Kungpui Mual’ tih hming a pu na a, hla phuahtu chauh ni lovin thuziak mi, writer zawng zawng an leng vek. Kumina an seng luhah pawh hian Hrawva leh Lalmama te chauh hi hla phuahtu an ni. Zoram mipuiin an hlut a, tlawhtu pawh a ngah.
Khawbung hi in 500 chuang khua an ni a, Mizo Hla Kungpui Mual hi khawtlang ta niin, mipui an phurin an lungrual a, hmun danga awm tawhte pawh a tangkai kaiah an tang emaw tih tur khawp a ni thin.