Hlauh leh huat nei loin sawrkar kan kalpui ang – Lalsawta

An party a sawrkar a nih chuan ram enkawlna kawngah hleih nei lo, hlauh leh huat bik nei loin sawrkar an kalpui dawn tih Congress president Lalsawta chuan a sawi.
Nilainia an party hun buatsaihah MPCC president Mizoram mipui nuai 12 chuang enkawl chu thil harsa a ni loa, ram hruaituten ramin kan dinhmun diktak kan neih theihnan mawh kan phur tih a sawi. “Sawrkar tan atanga thla khat chhungin hmasawnna tam tak kum 5 chhung daih tur a thawh lawk theih a, he thla khat chhung vek hian kum 5 chhung pawha siamthat theih loh pawi a sawi theih bawk. Congress party kan sawrkar a nih chuan tumah hleih nei lo, hlauh leh huat bik nei loin sawrkar kan kalpui dawn,” a ti.
Sawrkar leh mipui chu kalphung pangngai ringawtin an kal thei tawh loa, thil tam tak tihdanglam a ngai, tiin, an sawrkar a nih chuan Mizoram chu mipui beisei leh nghahhlelh angin an her danglam dawn tih a sawi.
Congress party manifesto ‘Tang puihna leh sawrkar tha’ chu tuna Mizoram mamawh a ni, tiin, “Mizo hi hnathawk hnam ni turin kan inbuatsaih a, kan inpeih tawh. Tang puihna hmangin hnam dingchhuak kan ni anga, tang puihna hmangin a tang apiang kan pui dawn. He hnam hian puih sen loh khawpa tang a neih tam a, chutiang khawpa hnam tang kan nih chuan, taimakna, thawhrimna nen he ram hi kan la siamtha thei a ni,” a ti.
Congress president hian an party-ah mithar a lawmlut a, an zingah hian Aizawl mayor hlui PC Lalhmingthanga a tel a ni.