Hlawh nei lovin Elon Musk leh Vivek te Donald Trump hnuaiah thawk dawn

Hlawh nei lovin Elon Musk leh Vivek te Donald Trump hnuaiah thawk dawn
Donald Trump chuan 2025 January thlaa US President atan lak luh a nih hunah USA-a tunhma a la awm ngai lo, Department of Government Efficiency (DOGE) an din tur thu leh he department thar kenkawl tur hian khawvela pa hausa ber tun US President inthlana Donald Trump tana thawh hlawk tak, Elon Musk leh sumdawng hlawhtling tak, politics lama lut ta, tun tum US President thlannah pawh Republican Party candidate nih tuma thui tak hma lo la ve tawh, a hnua Donald Trump supporter ni zui ta Vivek Ramaswamy te a ruat thu a puang a, mahse, heng hna pawimawh thawk turte hian sorkar atangin hlawh engmah an nei dawn lo.
DOGE hi US sorkarin tul lo a sum a sen a khawhral te tihtlem dan tur ngaihtuahtu tur an ni deuh ber a, Elon Musk hian sorkar sum sen dollar trillion hnih (trillion chu maktaduai hlir maktaduai – 10,00,00,00,00,000 tihna a ni) a tihtlem theih a inrin thu a lo sawi tawh, Vivek chuan mipui chhiah chawi te tul lo a hmanna leh a lo thlawna khawhral awm lo tura hma an lak tur thu a sawi ve bawk.
Musk leh Vivek te thawk dun tur hian ngaihven an hlawh nghal hle a, Democratic Party lam chuan Trump-a sorkara dinhmun pawimawh chelh turte hi an sawisel nasa hle thung a, Senator Elizabeth Warren chuan sum khawhralna tihbo tuma thawk tur ni si, mi pakhat thawh theih pahnihin an thawk dun tur chuan inrenchemna lam a kawk lo tiin X (Twitter)-ah a tihelna thu a tweet a, hei hi Musk chuan chhang letin, “Nangmah ang lo takin keini pahnih hian hlawh kan nei dawn lo, chuvangin a hlawk khawp ang. DOGE hian American mipui tan thil ropui tak a tidawn a ni. A hnathawh atangin kan teh dawn nia,” a ti.