Hlawha inseng hnem City

On Nov 17, 2023 10 0

Treble champion Manchester City chuan 2022-23 season chhunga an sum leh pai dinhmun (annual report) an tichhuak a. EPL club zingah player hlawha sum seng hnem ber an ni a, season hmasa ai an sum hmuh chu £99.8m ($124m) vel zetin a pung bawk.
City hian 2022-23 season tan dawn khan Borussia Dortmund atangin Eiling Braut Haaland an la lut a, Haaland hlawh atan hian kum khatah £45m zet an seng. Haaland hlawhah seng hnem bawk mah se Haaland vanga an hmu let erawh a tam viau thung a, an la champion ngai lohna Champions League-ah an champion a. Tui let hnu lama a vawi khat nan Treble champion an ni nawlh bawk. Haaland bakah hian Julián Álvarez leh Kalvin Phillips te an la lut a, Raheem Sterling, Gabriel Jesus leh Oleksandr Zinchenko te an chhuahtir ve thung.
City hian 2021-22 season khan hlawh bik atana an sen aiin 2022-23 season a an sen hi £69m zetin a tam zawk a. Season hmasa ah football staff an rawih aiin kum 2022-23 season-a an rawihte hi mi 56 zetin tlem zawk mah se hlawha an senso erawh a tam ta daih thung. City in 2022-23 season chhunga hlawha atan bika an sen hi £400 million ($498m) chuang a ni a. EPL club zingah hlawha hetiang zat seng tlin hmasa ber leh awmchhun a ni.
EPL-ah hian hlawh atana sum seng hnem ber chu Manchester United an ni thin a. United in hlawh atan an sen tarlan hnuhnung ber chu £331.4m a ni a. United in record an siam hi an elpui lian City hian £91.8m zetin an rawn khum ta a ni. City in sum dawnna leh matchday atanga an sum hmuh zawng zawng hi £341.4m a ni a, hlep £80.4m an nei tling a. Season hmasa lama an hlep neih £41.7m. an khum chiang hle. Inelna hrang hrangah an chetha a, inelna lian pathumah an champion ta hial khan matchday atanga an sum hmuh a tipung hluai.
Brand Finance Football in brand value a tihchhuahah City hlut zawn hi £1.51 billion anga chhutin club hlu ber an ni thar a. City hian club hlu ber ang hiala ngaih thin Real Madrid (£1.46bn) an khum a. Brand Finance Football in an chhut danin Manchester United hlut zawng chu £1.36bn a ni a, United hi palinaah an awm.