Zoremi Hmar Zote
-- Advertisement --
‘Kut hna thawktu’ han tih hian a huam zau thei viau mai. Thingtlang lo neih te, huan leh ran vulh thlengin a huam awm e. Vawiina kan sawi tur erawh hi chu huan leh ram ilo fahran nei ve lem lo, a nei ten an chhawr thin, “Hlawhfa” kan tih mai te hi a ni.
Thingtlang lama kan unau ten, “Kan buai lutuk, huan sâm tur hlawhfa kan ruai a, kan feh ni tin mai,” an tih te hi chu an la rethei tak tak lo; hlawhfa lakna tur an la nei alawm. Chuta an mi chhawrte zawk hi a ni vawiin a kan sawi tur chu. Thingtlangah chuan hlawhfa rate hi 400 a ni tlangpui a, ni tin, chhum lo chat lovin thawk ta se thla khatah 12,000 an hlawh ve tawk tihna a ni. Dam mawh hritlan te tawkin kar khat te inhlawh thei lo ta se an budget a buai nghal buaih a ni mai. Ration lakna leh chawhmeh man te, naupang school fee leh tul dang neuh neuh nen, Inrinni tukah sa khai hawn te an lo duh ve a, sa man a to si a, thla khata singkhat sanghnih hi chu a tlem lam hret chu a ni e. “Loan hmangin motor kan la ve a…kan harsa lutuk,” tite pawh an la harsa tawk lo; loan laknaa down payment tur Rs singnga nei lo an tam êm!
Hlawhfa thâ hmangin thlai leh ran vulhna man an seng lut chur chur a, a hah ber zawk hlawhfa chuan ni khatah Rs 400 tlawng a hlawh thung. Ei tur tuihnai leh taksa that duhna lam thil lei fo na tur an nei lo va, an dam loha damdawi an ei bak vitamin tha leina tur a awm lo. =hâl lai phei chuan ‘anrêp’ an ring deuh chawt a, vai buh hlui tawh lam nen phei chuan chakna han pai vak tur a awm lo; an hah si, a fê hian an fê chap mai a ni. (Sawi pawh a hrehawm, ka tawn hnu vek a ni)
Khawpui lam han thlir ila, Aizawlah chuan Mistiri hlawh hi 1000 atanga 1200 a ni tlangpui a, helper kan tih mai, hlawhfa rawihte hlawh chu 500 a ni. Mi in luaha khawsa ve hram hram, ration buhfaiina a daih vek sen loh avanga buhfai lei belh ngai an ni tlangpui a, Rs 500 han tlemzia chu, an chhung ten rawn phone-in an mamawh an rawn sawi a, an chhungte chah angin haw lamah chawhmeh lei haw se, zahnih zathum a sêng nghal ngei ngei a, buhfai a lei tel phei chuan 500 chuan a daih lo lam mah a ni. Mi in luah theuh theuh, Mistiri hlawh nena a inthlau lutuk hi a mak deuh a ni. In luah man chawi inang deuh reng bawk si, a tam zawk hi nupui fanau chawm an la ni zui.
In saknaah an han thawk a, Mistiriin chu chu ti rawh, cement put chhoh tur, balu leh rawra…an han ti a, an han pu chho tang tang a, an han mix leh a, an chawk leh lauh lauh a, chu chu cement plate-in an han sem/in-pass nghal char char a, ni tla van vuaiin, beka thlantui far zawih zawihin 500 an hlawh a ni. An in atanga hna an thawhna a hlat phei chuan an tan a hahthlak zual em em a, taxi han lak nan pawisa an ui…bakah an hlawhin a phâk lo a ni ber a., kein an kal tauh tauh mai thin. In an han thleng a, chau hnápin an han inbual sar sar a; Cement-in a eina an kut vun pan lutuk, sen no chuk maia chaw sa pawh khawih tha ngam lovin zanriah an han kil ve a, an hna thawhna chanchin te sawiin tui tak leh hlim takin chaw an ei a, an lungawi ve em em tho va.
Engkim mai hi khuanu hian a lo duang fel vek mai a lo ni. Ni e, inhlawhfa te, kan kut hna thawktu te,ran vulhtu leh Sangha dil siam an ni emaw, kan zavai hian inmamawh tawn vek turin khuanu hian min lo duang a lo ni e. Heng hlawhfa kan tih te, ni tin kawla ni chhuak chhiara inhlawha chhuak thin te tel lo hian eng anga hausa pawh ni rawh i, kan awm thei reng reng lo. Hlawhfa awm lo se tuin nge in sa thei ang! Kan ngaihsan loh em em Karimganj vaiho hlir kan chhawr mai dawn tihna a ni. Ek paih awm lo se Aizawl khawpui hi kan buai viau dawn.
Heng hna, hna hniam tak anga kan ngaih thawktute vanga lung muanga tuk tin zan tin inpak puar ve mai mai kan ni a, hlawhfate avanga hna thawk thei, ei bar zawnna kawnga ke pen thei mai mai kan lo ni e. Inhmusit tur kan lo awm hauh lo mai. Keini chauh lo, khawvel hian taima leh hna thawk thin kan ngaisang vek a, eng hna pawh ni se hna a nih chuan a hluin a zahawm vek mai. Hlawhfa rate hi han sâng ve deuh se!