“Hlep ru” vs “Hlep ru tam”

‘Public Works Department chu mipuiin sum tamna leh a thawktute pawh hlep ru tam nia an hmuh ang chu a takah a lo ni lo tih a hmuh thu MPWD changtu minister-in a sawi’ tih chu chanchin thar lamah hmuh tur a awm a.
Tunhma kum tam tak kalta atang khan PWD hi department hming sawi hlawh berte zingah a tel a, a chhan pawh, PWD-a thawktute chu kawng siamna tur hlep ru thin leh, chumi avanga kawngpui pawh tha hleithei lo anga sawi hlawh an lo ni tawh thin a ni ang. Mi zawng zawngin an zawh luai luai ‘Kawngpui’ a nih miau avangin a chhiat a thatah a langsar lo thei lo a ni. Kawngpui a han tha ve deuh a, ‘rulngan pa ang zara dum’ tih tawngkam te pawh hriat tur a awm a, mahse kan kawngpuite hi alkatra luan hlim chhawn hun rei lote bak chu ‘rulngan pa ang zara dum reng’ thei a lo ni lo thin si a, hei vang hian PWD hian sawi an hlawh bik tiin a sawi theihna lai a awm ang.
Kan thupui hi, minister thusawi sawiselna/sawihnawmna (critisizing) ngawr ngawr lam a ni lo a; chutih rualin, minister meuhvin, ‘hlep ru tam nia an hmuh ang chu a takah a lo ni lo’ tia a sawi takah chuan, Ukil ho ngaih pawimawh ber ‘evidence’ tih thumal hi a lo lang nghal vatin a rinawm. Eng pawh ni se, chu chu kan khel ber tur a ni rih lova, ‘hlep ru’ tih leh ‘hlep ru tam’ tih hi kan khaikhin tur chu a ni.
Hlep ruk hi a tlem pawhin, a tam pawhin, ‘hlep ru’ hming chu a pu ta hrim hrim a, a hremna lam erawh, thubuai reltu dan-hre-mite rel ang ang a ni ang a. Hlep ru tam na na na chu hlep ru tam lo ai chuan a hremna pawh a na deuh bik turah a ngaih theih. Mahse, a tam emaw, a tlem emaw, ‘hlep ru’ an nih tawh chuan ‘dan bawhchhiatna’ a nih miau avangin ‘dan anga an chungthu rel’ a ngai tho tho, tih hi kan zuk pholan tum ber chu a ni.
Mizorama danhremi lar tak Pu K.L.Liana (Muangin chawl se) khan, eirukna chungchanga tehkhin thu a sawi fo chu, nula leh tlangval tawm dun, a hnua an thiltih rah lo lang thin, kha a ni. Mizoramah eirukna a hluar nasatzia tihchianna pakhat chu eiruk duh loh kawngzawh, tawngtai rual, etc. te hi a ni awm e. Chutiang thil (event) a awm thin chhan pawh, sawrkar hnathawk mi thenkhat, an thawhchhuah phu lova khawsa thei an awm thin vang a ni.
Eirukna hi a liantham emaw, a tenau deuh emaw, eirukna a nih tawh hrim hrim chuan sawi nep tum mai lova, huat, hnualsuat leh dodal ngam hi kan hnam damna tur a ni.