Hlepruknaa fimhlim MLA ni turin ZPM bial viltute intiam

ZPM-in bial viltu atana a ruatte chuan MLA inthlanah thlantlin an nih chuan hleprukna laka fihlim MLA (corruption free legislator) ni turin ban pharin an intiam.
July 11 khan ZPM-in bial viltu atana a ruatte hi an intuaithar a. Party vice president Rev Dr K Thanzauva leh Dr Kenneth Chawngliana ten hun an kaihruai a, sawihona nei zuiin chief ministerial candidate Lalduhoma leh general secretary i/c Policy Dr KC Lalmalsawmzauva ten an kaihruai thung.
Bial viltute hian ruat an nih tan, April leh tun inkara an bial vil chhunga hmasawnna leh harsatna an tawhte sawiin, an zirho nghal a. ZPM thil tum an aupui mek zingah ‘Bana Kaih Policy’ chu thalaiin an tuipui thu te, thlai thar hralhna rate siam chu loneituten an tuipui thu te, kalphung thar mipui sawrkar chu mitinin an nghahhlelh tawh thute an sawi. Long term policy zingah kawlphethaa intodelh thuai tura mipui beiseina a san thu an sawi bawk.
A thlawna sem policy chu mipuiin an hnawl tawh avangin vote thlak dawnah pawh sum semin awmzia a neih an rin loh thu bial viltute hian an sawi a, mipui khawngaih vote dawng turin tih takzeta inngaihtlawm a pawimawh tih an inzirtir a ni.