Hliam vang bawkin Neymar talbuai leh tawh!

Hliam vang bawkin Neymar talbuai leh tawh!
Saudi Arabian club Al-Hilal chuan sum tam tak nen beiseina sang tak nei chungin an senglut a, hliamin a tihbuai zui tak thuai avangin Al-Hilal tan khelh mumal a nei thei ta lo a, an ram lamah a club hlui Santos-in an lalut a, Nilaini khan Brazilian Serie A Championship season thara bul a tan vawikhatnaah a ke a tina leh nghal a, Neymar chuan mittui nen khelmual a chhuahsan leh tawh!
Santos a zawm hnuah kum 33 mi Neymar hian game riat khel tling tawhin, hliam avanga a buai thinna teivet pawhin a kiansan ve tak tak dawn nia a lan hnuah Atletico-MG leh Santos inkhelh tumin minute 34-na lekah a inhliam leh ta a ni.
Santos forward Neymar hi karliamta Pathianni mai khan malpui hliam avanga chawlhkar ruk a chawlh hnuin Fluminense lakah khelmual a lut thei hlimhlawt a, Nilaini zanah Atletico-MG hmachhawn turin starting line up a chang zui a; Santos khelmual Vila Belmiro stadium-ah khan Brazilian club tana game 100 a khelh tlin lawmpuina atan special number 100 shirt a ha chhuak nghe nghe a, mahse, Barcelona forward hlui bawmtu chu mittui bawk a ni leh ta!
Alvaro Barreal-a goal hmanga sihnih faia mualneitu Santos-in hma an hruai mek laiin Neymar hi khelmualah a thu hnawk a, damdawi thiamte a lo nghak a, an han bawisawm a, inkhel chhunzawm thei zia zang a nih tak loh hnuah khelmual atanga player inhliam phurh chhuahna motor vehicle chung khuh nei lo hmangin mualsir lamah enkawl zui tura phurhbo a ni leh ta a ni!
1 Tuna a ke veilam na avang bawk hian chawlhkar ruk zet a lo chawlh phah tawh a, tuna a intihnat leh hnu hian engtia rei nge a chawlh leh dawn hriat theih a ni rih lo.
Neymar-a khelmual chhuahsan tur hi a team-mate thenkhatin an hnem liam liam a, an zingah a Brazil team-mate hlui leh Atletico-MG forward Hulk a tel nghe nghe.
Santos coach Cesar Sampaio chuan a forward inhliam dinhmun dik tak sawi tura a la hma deuh thuin media mite zawhna a chhang a, hun rei tak a chawlh leh lohna tura tawngtaipui bak tih theih leh sawi theih an neih rih loh thu a tarlang tel.
Paris St-Germain forward hlui hian Al-Hilal chhuahsana an ram club a zawm hnuah a naupan lai club tan game riat atangin goal thum a thun tling tawh a, Santos lama ngai a rawn awh chhoh leh tan tak hnuin World Cup qualifiers-a Argentina leh Colombia hmachhawn tur Brazil squad-ah pawh an han telh leh ngei a, mahse, hliam avangin a inhnukdawk leh ta tho a ni.
Brazil record scorer Neymar hi khup hliam buaithlak chi (anterior cruciate ligament injury)-in a tihbuai hrep avangin October 2023 hnu lamah ram tan a la inlan leh ta lo.