Hliam vanga chawl rei tur Lloris

Pathianni zan Premier League inkhel pakhata sikhat faia Manchester City an hneh tuma a khup tina Tottenham Hotspurs goal-keeper Hugo Lloris hliam endik a nih hnuah chawlh-kar ruk tal a chawlh tur thu nemngheh a ni.
France captain hlui hi tunah kum 36 mi ni tawh mah se season kal laia Spurs league game vawi 22 khelh tawhah match 21 khel tlingin, a team chu Pre-mier League table-ah pa-ngana a nihpui mek a, Champions League khelh phakna hmun an fight mek laiin hliamin a tlakbuak.

Tottenham hian an number one goalkeeper thlaveng atan Southamp-ton leh England interna-tional hlui Fraser Forster an kawl a; academy player pahnih Brandon Austin leh Alfie Whiteman pawh duhthlan tur nei tho bawk mah se anni pahnih hi chu senior level-a tawnhriat la nei lo an ni a, season tawp lam hun pawimawha chhawr atan chuan an ruh a la no rih deuh mai thei!

Naktuk, Inrinni hian league-ah Leicester City tumin, karleh Thawhlehni Champions League round of 16 first-leg lamah AC Milan luhkhung tur an ni bawk a, an veteran goal-veng Lloris an chhawr thei lo tur hi Spurs tan hlohna lian a nih ngei hmel!

Kum 2018 World Cup-a captain ni chunga France champion-puitu Lloris hian thla hmasa mai khan international football a chawlhsan thu puangin, club lamah erawh a vanglai a hmang chho mek emaw tih mai turin league season kal laia goal vawi 21 a ven tawhah game sarih chhung goal a chhuah lo.

Spurs goal-a ding tura ngaih Forster hian nikum nipui thawt lai khan free transfer-in north London club hi a zawm a, a season khatnaah Spurs tan Pre-mier League game khat chauh la khelin, chu chu Boxing Day-a Brentford nen sihnih ve ve thuna an inhnehtawk tum kha a ni.