Thawhtanni Turkey lirnghingin a chenna in a sawi chim hnua a chin hriat zui ni ta lo Ghanaian foot-baller Christian Atsu chu nimin lam khan dam taka chhanchhuah niin social media lamah thehdarh an awm a, mahse, Nilaini khan a khelhna Turkish club Hatayspor director Volkan Demirel chuan an player chu hmuh a la nih loh thu a sawichhuak.
Tarlan tawh angin, kum 31 mi Atsu hi in chim kar atanga dama an pawh-chhuah hnuah a hliam enkawl turin damdawi in lama hruai a nih thu a darh a, mahse, Demirel chuan he thuthang hi belhchian dawl lo a nih thu leh an player awmna chin an la hriat loh thu a sawi a, player bo zawn hna chu ngawrh taka kalpui chhunzawm zel a nih thu a tarlang tel.
-- Advertisement --
Ghana forward Atsu chhanchhuah a nih thu sawichhuak ngawttu hi Hatayspor club vice-president Mustafa Ozat niin, player agent Nana Sechere chuan, “Christian-a awmna hre tur hian kan theihna zawng zawng kan seng mek a, a chhungte mangan dan tur hi kan hriatthiampui,” a ti.
Social media post lama chhanchhuak tawh anga thuthang chungchang boruak Nilaini vek khan Mustafa Ozat chuan sawi-lang telin, “Nimin kha club lam atangin dama chhan-chhuah a nih thu kan lo hre ve a, mahse, thu dik chu a awmna lai kan la hre fuh thei lo tih hi a ni,” tiin.
Volkan Demirel pawhin Turkish sport website Spor Arena hnenah Atsu leh an sporting director Taner Savut awmna an la hriat loh thu nemnghet ve bawkin, “Damdawi inah awm tawh ni se eng aiah nge he thu hi ka puanchhuah loh tehlul ang ni?,” a ti.
Damin an pawtchhuak a, damdawi in lama enkawl a nih thu a darh hlim khan Ghana Ambassador to Turkey Francisca Ashietey-Odunton pawhin radio station Joy FM hnenah Atsu chu khawi damdawi in berah nge an thawn tih a chian bik loh thu a sawi a, “Ministry of Foreign Affairs lamin Atsu chu damin an chhanchhuak ngei em tih hrilh turin min hriattir a, khawi medical centre-ah ber nge an dah tih nen.
“Kan ngaihven a, thil a chiang lo nuai a, tute mahin sawi theih an nei lo,” a ti.
Tarlan tawh thin angin, Ghana national team player Atsu hian English club pahnih Chelsea leh Newcastle United-a thang khat lian dawn hun a hman hnuah nikum September thla khan Saudi Arabian team Al-Raed lama season khat hun a hman hnuah Hatayspor a zawm a, tun dinhmun hian a nangching ta a ni.
Newcastle tan khan game 107 khel tlingin, England-a a khawsak chhung khan Everton leh Bournemouth thuam a inbel bawk.