PSG petchhuaktu Marseille
Record siama French Cup trophy 14 kawl tling Paris St-Germain chuan Nilaini zan French Coupe de France last 16 inkhel pakhatah 1-2-in Ligue 1 lam pawha an elpui lian ber ni mek Olympique de Marseille an ngam lo a, knock out stage an chuangkai zo lo.
-- Advertisement --
French Cup title vawi 10 chang tawh chunga kum 1989 hnu lama la champion leh ngai ta lo Marseille hian goal thun hmasain, minute 31-a an penalty hlawhchhuah atangin Arsenal striker hlui Alexis Sanchez khan hmahruaina goal a chhuihlut a; he penalty hi Cengiz Under laka chesual Sergio Ramos chawi a ni.
Serie A club Inter Milan atanga OM a zawm hnua a season khatnaah Sanchez hian rah a chhuah tluang hle a, a goal 11-na a ni der tawh!
Real Madrid defender hlui Ramos vek hian chawlhlawk dawn hun pekbelhah a tihsual siamthain Neymar thawhrah atangin league hmahruaitu team siphurh a sut a, first half a zo.
Second half tir lam minute 57-ah Ukraine midfielder Ruslan Malinovskyi chuan mualneitu team hmahruai nawnna goal khung ve lehin, PSG hian an siphurh hnuhnung zawk sut tumin tan khawh teh mah se an star player pahnih Lionel Messi leh Neymar meuh pawhin Paris club tlawm tur an chhan zo lo a, French Cup quarter-final lut zo loin an tla fel.
Argentine Messi hian free-kick atangin goal thun theihna hun remchang hmu bawk mah se a hlawhtling zo lo a; Neymar pawh hian an siphurh sut theihna hun tha a bawhpelh a, a free-kick chhuih atangin Ramos chuan a tauhlut thung.
Tun kha kum 2011 hnu lama Marseille-in home-a Paris Saint-Germain an hneh leh vawikhatna niin, February ni 26 khian tualchhung league lamah team pahnih hi Marseille khawpuiah bawk an intawng leh dawn a; Pathiannia an mikhual Nice laka 1-3-a an tlawm avang khan tun dinhmun Ligue 1 table-a pahnihna luahtu Marseille hian point riatin hmahruaitu PSG hi an pha lo.
Stade Velodrome-a Coup de France round of 16 inkhelah cham-pion tura rinkai ber an tuktlawm theih avangin Igor Tudor-a team Marseille kha a tum 11-na’na trophy chawi turin mite rinkai ber an ni ta.
PSG nen tum 27 an intuma an vawihnih chakna an lawm hnu lawkah Mar-seille captain Valentin Rongier chuan France 3 hnenah an hnehna sual-chhuah chu an supporter-te’n hun rei tak an lo nghah tawh a nih thu sawi chungin fans nena chak an lawmho thei a lawmzia thu hahipin a sawi!
Tun kha he tournament chanchina team hlawhtling ber ni mek Paris St-Germain-in kum hnih chhung a zawna round sang zawk an thlen zawh lohna niin, season liamta khan last 16 lamah bawk Nice chuan Paris club lian hi an lo petchhuak tawh bawk a ni.
PSG captain Marquinhos chuan an tihsual thenkhat an tuar tih sawi chungin Cup match-a an elpui lian ber an nih avangin an tlawmna kha a na zual tih a sawi a, hnehna chang ngei chung leh round sang zawk lut chunga Paris-a kir an duh tih sawi chungin kha aia thaa khel thei tur a nih thu leh rim taka thawka hmalam pan tur an nih thu a tarlang tel.
Nilaini Coupe de France last 16 inkhel dangah hun pangngaia sikhat ve ve thuna inhnehtawk Angers leh Nantes chu penalty hmanga thelh niin, 4-2 hnehna nen Nantes an tlang.
Auxerre khelmualah 3-2-in Rodez an chak a; Lyon leh an mikhual Lille pawh 2-2-a an inhnehtawk hnu penalty petah 4-2-in Lyon zawkin quarter-final an thleng.
Paris FC leh Annecy pawhin 1-1 bak an pelh zawh loh avangin shoot out hmanga pawhthen an ngai a, 6-5-in mikhual Annecy an vannei.
Toulouse chuan 3-1-in an mikhual Reims an hneh mai a; Vierzon FC mualah sikhat faiin Grenoble an chak a, round sang zawk an lut ve bawk.