Hliam vanga inhnukdawk Nadal

A khel bawr hliam avangin Rafael Nadal chu Indian Wells leh Miami lama Masters 1000 tournament khelh tur atangin a inhnukdawk.
Kum 36 mi Spaniard hi Australian Open second round-a Mackenzie Mc-Donald a hneh loh hnu khan eng tournament-ah mah a la inlan leh ta lo a, a reh vang vang hnuah kum 2007, 2009 leh 2013-a a champion-na, nikum final-a American Taylor Frit a hneh lohna ni bawk California event atanga a inhnuhdawh thu hriat tur a awm zui ta a ni.
22-time Grand Slam champion hi chawlhkar ruk atanga chawlhkar riat chhung chawl leh tura ngaih a ni a; Indian Wells director Tommy Haas chuan Nadal chu dam thuai thuai tura duhsakna hlan chungin kum thara hmuh theih ngei an inbeisei thu a sawi.
Nadal hi tunhnai chawlhkar liamta chhoah khan physio leh gym work ngheng chungin a inla fit kal mek a, mahse, karleh Thawhtannia khelmual rap leh tur em chuan a la damchiang hman dawn lo a, chawlhkar thum hnua khelh tan tur Miami Open atan pawh a la inpeih chhuak hman dawn lo a ni.
A kirlehna hmun atana a tinzawn chu tum 11 a champion tawhna Monte Carlo Masters niin, April ni 9 atanga khelh tan tur he tournament hi Euro-pean clay court season-a inelna lian hmasaber tur a ni nghe nghe.
Twitter lamah Spaniard hian a dinhmun mek tarchhuakin, a doctor-te thurawn anga rehab, gym leh physiotherapy lam a buaipui thu leh duhthusam taksa a neih huna kir chauh a tum thu a sawi.
“Tun dinhmuna ka sawi theih chu Indian Wells leh Miami lamah ka inlan thei dawn lo a, a pawi ka ti takzet a ni. Ka US unaute ka ngai a, kum tawp lamah erawh an hmaa inkhelh hman ka inbeisei,” tiin.
Hetih lai hian Cameron Norrie leh Carlos Alcaraz-te pawh ATP Tour final an khelh zawn hnuah tunkara khelh tan Mexican Open atangin an in-hnukdawk ve bawk.
Norrie hian a chauh tawngkhawng a chhuanlam a; Spaniard Alcaraz hian Pathianni Rio Open final-a British number one a hneh loh tuma a ke a tihnat kha a chhuanlam ve thung.