Laih vanga hmai sen tan tan thin te hmangaihna lamah an rinawm duh

I lai chhe ve viau thin em? Laih vanga hmai sen deuh tan tan thin te hi hmangaihna lamah an rinawm duh bik niin relationship lama mithiam ten zirchianna an neih atangin an sawi tlat mai.
Mipa emaw hmeichhia emaw, laih vanga sen deuh tan tan thin te chu chutiang awm ve ngai lo te aiin an thil phal a, an rinawm a, an dik duh bik niin an sawi.
Hetianga sen deuh tan tan kan tih hian biang, nghawng, beng leh awm (chest) ah te a lang chhuak ber thin. Hetianga i awm vanga miin rinawm leh duhawm ta riaua an ngai tur che hi mak i ti em? Hahdam tak khan pawm mai teh.
California-a researcher-ten experiment chihnih neiin, volunteer mi 60 te chu a chetchhiat lai an ngaihtuah kir tir a, chutih lai chuan engtiang chiaha laia, sen deuh tan tan nasa nge an nih tih te an lo teh a. Tichuan, mi 60 te chu raffle ticket sem tur an pe ta a, mak angreng takin laih vang sen deuh tan tan nasa deuh ho chuan an sem hnem thei zawk tlat.
Experiment pahnihnaah chuan, volunteer-te chu lemchanthiam te an tana chanchin lawmawm an hrilh laia an awmdan en entir leh a, volunteer te chuan lemchanthiam zingah pawh chanchin lawmawm an dawn laia lai deuh taka sen deuh tan tan te chu chapo hmel deuh taka awm te aiin an rinawm an ring zawk tlat bawk.
He zirchiannaa an hotu Matthew Feinberg chuan, “Tlema han laih deuh tat tat hi inngaihtlawmna lantirtu a ni a, chutianga awm thin te bula awm chu nuam kan ti a, kan hahdam a, kan rinngam vang a ni thin,” a ti.
Hei hi researcher-te chuan ‘pro-sociability’ an ti a, hei bakah hian romantic partner atan pawh an thlanawm zawk a, hetianga lai awlsam deuh te hian an kawppui te pawh midang lakah an rinawm loh san ve mai mai lo niin an sawi bawk.