Hlimen him lo lai chhuahsan turin ti Tlawnga ruang chhar finfiah thei ta

Tunhnaia Hlimen leh a chhehvela chhiatna thlenna hmun vel chu chenna atana him lo ngai mithiamten an ngaih hnu ah a awmsa te pawhin chhuahsan turin thuneituten an ti. Hetihlai hian Zirtawpni zinga Tlawnga ruang hmuh chu Aibawka ruang pahnih zawn la meka pakhat zawk a ni tih finfiah a ni.Mizoram State Emergency Operation Centre (MzSEOC) atang leh Directorate of Geology & Mining chuan Hlimen leh a chhehvel, tunhnaia lei chet avanga chhiatna thlenna laia chengte chu chenna atana hmun him loah an ngai a. He thurawn hmang hian District Disaster Management Authority Aizawl chuan chhuahsan turin dan tlawhchhan hmangin a hriattir.
Cyclone Remal avangin Aizawl district chu Mizorama chhiatna tuar nasa ber pawl niin, chhawmdawlna leh chhanchhuah hna thawh mek a ni a. MzSEOC leh Directorate of Geology & Mining-in thurawn an pek angin, Hlimen khua leh a chhehvel leilung hi a nghet lo hle a, ruahtui tam zawk a tlak zel chuan chhiatna nasa tak thleng leh thei nia sawi a ni.
He thurawn ang hian DDMA Aizawl chairman, bawrhsap Nakzuk Kumar chuan Section 30 (2)(iii) of the Disaster Management Act 2005-in thuneihna a pek angin, Hlimen leh a chhehvel, leimin hlauhawmnaa cheng zawng zawngte chu an chenna chhuahsana hmun him lama insawn turin a hriattir a ni.
Hetihlai hian Zirtawpni chawhma dar 10.30 vel khan Hortoki bul Tlawng kaiah ruang pakhat chhar a ni a, Aibawka ami, leiminin an in a hnawl avanga ruang an zawn mek Vanlalruali a ni tih hriat a ni.
Thudawn danin, Zirtawpni zing khan Mualkhang amiten Tlawng luiah ruang ni awm tak an hmu a. Hortoki lam hriattir nghal niin, an ni hian an lo chhar a ni. Hmeichhe ruang a ni a, a len loh avangin naupang nia ngaih a ni. Chuti a nih chuan Melthum ami ruang la hmuh loh Deborah Lallawmawmi (11) d/o R Lalmuanzova a nih ringin Melthum atangin, ruang post mortem exam an tihna Kawnpuiah lamkal an intir a, Deborah a ni lo tih finfiah a ni. Hmeichhia a nih avangin Aibawk ami nupa ruang zawn mek Matthew Lalchhanhima (34) nupui Vanlalruali (34) ni theia ngaih a nih avangin Aibawk atangin lamkal an tir ve leh a, an ni hian a ni tih an finfiah thei ta a ni.
Tunhnaia chhiatna thlenga thi zat hi mi 34 nia ngaih theih an ni ta a. Vanlalruali nen hian tun thlengin ruang 29 hmuh a ni tawh a, midang 5 la zawn mek an ni. Zirtawpni bika ruang zawn hna thawhnaah, Tlawng luia chhar Vanlalruali tih loh midang hmuh an ni lo.