Hlimen leh Melthum a leimin tuarte CM-in kawm

Tunhnaia Hlimen leh Melthuma leimin tuar leh hmun him loa awm insawnchhuah lailawk ngai aiawhte chuan Nilaini khan chief minister Lalduhoma a office-ah an hmu a. Aizawl South-III bialtu MLA Baryl Vanneihsangi Tlau chuan a tawiawm.
Hmun him loa cheng, insawn lailawk ngaite chu school building leh hmun remchangah an invawm lut a. Zirna a pangngaia a kal chhoh leh tawh dawn avangte, AMC by election neih huna polling station-a hman turte a nih avangin relief camp ngaihtuah ran tul an tih thu chief minister hnenah hian an thlen a ni.
Chief minister chuan a tul angte biaksak nghalin, Transport department rama Temporary Relief Camp a ranglama sak a nih tur thu leh chu hmunah chuan nakum January thlenga an chen lailawk theih dawn tih a sawi a. Disaster Management & Rehabilitation department-in camp sakna tur sum an kawl reng tawh a, hna an tan nghal mai dawn, tiin, chhungkaw insawn ngai chu buhfai bag khat theuh pek an nih tur thu a lo hrilh a ni.
Leimin tuarte sawi danin, chenna in 46-a khawsa chhungkaw 69 vel hmun him lamah an inthiar chhuak a ni.