HLUTNA

BY Reuben Lalnunthara Hnamte

Khawvelah hian mi hlu bik leh hlu lo bik te hi an awm riau ni hian kan hre thin a. Mahse, tu pawh mai hian han inchhut chian chuan hlutna hi kan lo nei vek mai. Khawvelah hian hlu lo bik riaua inhriate hian mal ngawih ngawiha inhriatna te neiin, mi tam tak chuan nun hian awmzia a nei lo nia hriain mahni nunna lak mai duhnate alo piang thin. Mi te anga mi lar te, mi hausa te, lehkhathiam leh fing emaw kan nih loh avanga Hringnunin awmzia nei lo hlea hriatna hi thalai tam tak rilruah a awm thin. Mi thenkhat chu mi lar tak te an lo ni thut a, an hluin an ropui khawp mai. Mahse, larnate hi damreina a ni chuang lova, hlimna lah a ni chuang bawk hek lo. Mi lar tak, mi te ngaihsan huai huai te hi an hlim viauin kan hria a ni maithei a, kan lo awt thin viau pawh a ni maithei. An nun chhungril erawh a tam ber hi an hlim lo; Pathian hre lo mi ngat phei chu an nun hi a beidawng ru em em zawk. Mi lar zingah mahni nunna la mai te, ruihhlo ngawlvei an tam em em a, a dam lah an damrei lo zawk emaw tih tur a ni.
A chang chuan mi hausa tak nih te hi hlim viau tur leh nuam viau turah kan ngai thin. Mi hausa hlim lo an tam em mai! Engmah hi lutuk hi tha reng a awm lo. Pathian hre lem lo leh Pathian tihna nei lo mi hausa kan tih te hi an chhungkua belhchian dawl lo tak tak, an nun chhungril hlim lo, thlamuanna nei lo an tam em mai. Hausak te, lar te a tha e, miin a hman thiam chuan khawvela mi awhawm ber pawh a ni thei; nimahse, hauhsak emaw lar emaw ngawt hi Hlutna a ni lo tih erawh hriat a pawimawh hle. Khawvela kan lo pianchhuah hian engemaw zawng tala midangte tan emawa hlutna neih hi a pawimawh hle. Chubakah hlu lo riaua inhriatna hi thil pawi tak a ni bawk. Nu pumchhung atanga kan lo piang chhuak hrim hrim hi mi hlu kan ni nghal a, Pathian siam leh din kan nih tlat avangin. Ramsate anga lo piang ve satliah kan ni lo va, mihring hi Pathian thawkkhum ngata siam kan nih avangin kan hlu bik hle a ni.
Tunlai thalaite zingah hlu lo nia inhria kan tam a, rilru hah nan leh beidawn nana hmang kan tam a, hei hi kan thlir dan dik loh vang a nih avangin a pawi em em a ni. Mi te anga talent kan neih loh avangte, thiam bik engemaw kan neih loh avangte hian engmah ni lo leh hlu lo riaua inhriatnate kan nei thin. Mihring ka nih hian ka hlu hrim hrim a, vanduaina avanga pianphunga rualbanlote lo awm thin te avang hian mi pangngaia ka lo awm hlutziate hriat a pawimawh a. Pianphunga rualban lova lo piang leh vanduaina avanga lo awm ka nih pawhin, tih theih ka nei a, hlutna ka nei tih inhriat hi a tul hle. Rualban lo nia kan hriat, mi hlawhtling tak tak hriat tur an awm thin. Mi chuang leh engmah ni lo nia inhriat a thut ngawt tur a ni lo. Theihna ka nei a, mi tih ang ka ti ve thei, mi hlu ka ni tih inhriatna, kan hlutna tilang chhuak tura hmalam pan tura ke pen hi a va pawimawh em! Mi hausate, mi lar kan tih te hi awlsam tak a lo hlawhtling an ni lo; theih patawpa an beihna avanga lo hlawhtlinga lar te an ni. Chumi ni tur chuan Hlutna leh theihna ka nei a ni tih hi i pawm ngam ang u.
Mi hausate pawh hi mi retheite avanga hlu mai an ni a, mi rethei awm lo se hauhsak hlutna a awm lovang. Cerventes chuan “Khawvelah hian chhungkaw pahnih chiah an awm a, Neia leh Neilova te chhung an ni” a ti a. Mi hausate pawh hian mi rethei hi an hmusit emaw, diriam mai tur a ni miah lo, mi retheite avanga hlu mai an ni. Mi retheite hi ngaihsaka ngaihlu viau tur an ni zawk a; chutih ahnekin mi rethei hmusit a, an hauhsak avanga chapo ta viau maite hi mi â tak an ni tawp mai. Khawvel mihringte hi hausa ta vek ila, retheih awmzia kan hre lovang a, Pathian mamawhna kan nei lo bawk ang. Kan lo hausa lo va, kan rethei a nih pawhin kan hlu hle tih hriat tur; keimahni avanga mi hausate pawh hlu mai an ni zawk. Chutiang bawkin mi lar te pawh hi, mi lar lo te avanga lar thei chauh an nia, a ti hlutu chu a lar ve lo te kha an ni tlat mai. Lar ta vek hlawm ila, mi lar hlutna a awm lo vanga, a nawmna pawh a awm lovang. Chuvangin khawvelah hian tumah hi inhmusit leh indiriam theih kan awm lo. Kan inmamawhtawn a, kan intawiawm tawn avanga nunga, hausaa, lar thei chauh kan ni.
Chuvangin hlutna hi hauhsak leh lar emawah a innghat lo va, khawvela nung tura ka lo piangchhuak hrim hrim hi mi hlu leh hlutna nei ka ni tih hriat a tul hle. Ram hruaitute pawh hi mipui thlan avanga MLA, Minister ni thei chauh an ni. Mipuiin thlang duh lo se, vote duh lo se, engmah an ni lo vang. Ram hruaitu thenkhat, an han lal seuh seuh a, a thlang laltu mipui ngainep leh chapo tak si thin te hi mipui tan thlan leh tlak an ni lo ka ti mai. Chuvangin chapona atana hmang ni lova, mahni hlutna leh midangte hlutna hrethiam apiang hi mi vannei leh awhawm an ni zawk a, mi hlawhtling tak an ni duh bawk. Mihausate ti hausatu leh chawimawitu chu mi retheite an ni a; mi hausate chuan mi rethei zawkte chu an ngaihluin a theihna apianga an tanpui hi an mawhphurhna a ni a. Mi lar leh ram hruaitute pawh an larna leh an tlin theihna chu mipuite an ni. Chuvangin kan hlutna leh kan pawimawhna theuh kan inhriat tawn a, kan intawimawm tawn hian khawvel chu Paradise-ah kan siam a lo ni reng mai.