Lok Sabha inthlan NDA vs INDIA

Congress president hlui Rahul Gandhi chuan nakum Lok Sabha inthlan chu ‘NDA leh India, Narendra Modi leh India’ inbeihna a ni ang tiin a sawi.
Bengaluru a Opposition party meeting neihnaah eptu intelkhawm te chu Indian National Developmental, Inclusive Alliance an inti a. Gandhi chuan, “Kan hriat chu tuin emaw INDIA a beih chuan INDIA a chak thin” tiin a sawi a. “Tute tan nge kan beih tih mahni kan inzawt? Kan ram aw rahbeh mek a ni a, tun hi kan ram aw tihchhuah leh tumna a ni a, chuvang chuan he hming hi thlan a ni,” tiin a sawi.
“Narendra Modi leh India, a ideology leh INDIA inbeihna a ni” tiin Rahul Gandhi chuan a sawi zui a ni.
Congress leader chuan, “Tun inbeihna hi political pawl pahnih inbeihna a ni lo va, idea of India humhim duha inbeihna a ni. History in thlir a nih chuan tute mah idea of India bei thei an la awm lo. Tun inbeihna hi idea of India leh Narendra Modi inbeihna a ni” tiin a sawi bawk.
West Bengal Chief Minister Mamata Banerjee pawhin, “BJP, INDIA i cho em? Kan ram hi kan hmangaih a, he ram hmangaihtute kan ni a, thalai tana awm kan ni a, loneitute tana awm kan ni a, Dalits tana awm kan ni. Economy tha duha awm kan ni a, ram tana awm kan ni a, khawvel tana awm kan ni. Modi sorkar in a tih awm chhun chu sorkar lei leh hralh a ni. Vawiin hian tangrual lungphum phum a ni ta,” tiin West Bengal CM chuan a sawi a. Banerjee chuan an inhmuhkhawmna chu ‘a tha hle’ tia sawiin, “Vawiin atangin chona a ni” tiin a sawi bawk.
AAP convener leh Delhi Chief Minister Arvind Kejriwal chuan, “Sorkar kum kua chhungin, Modi hian sector tin a tichhe vek tawh. India thar kan ngaihtuah a ngai a ni,” tia sawiin Central sorkar policy te chuan mipuite tawrhna a thlen tiin a sawi bawk a. Kejriwal chuan Prime Minister chuan “Railways, airports….engkim a hralh tawh,” tiin a sawi bawk.
Maharashtra Chief Minister hlui Uddhav Thackeray pawhin Opposition ten inhmuhkhawmna tum hnihna hlawhtling takin an nei a ti a. “He ram hi kan chhungkua a ni a, kan chhungkua humhim turin kan bei a ni,” a ti a, “NDA policy te hi kan beih a ngai a, mimal tumah kan bei lo. Party pakhat, mi pakhat hi India a ni lo,” tiin a sawi bawk.
Opposition party-te hian Bengaluru-ah hian thutlukna siam a nih theih nan rei tak an chai ho va, lungrualin kum 2024 Lok Sabha inthlanah National Democratic Alliance te chu an khing dawn ta a ni.
“Democracy leh Constitution humhima mipuite chhanhim nana inhmuhkhawmna pawimawh tak a ni. Thukhat vuain party 26 ten resolution an thlawp a ni,” tiin Congress president Mallikarjun Kharge chuan a sawi bawk a. “Kan alliance hi Indian National Developmental, Inclusive Alliance (INDIA) tih a ni ang a, hlawhtlinna ropui tak a ni,” tiin a sawi zui bawk.
INDIA hian member 11 awmna coordination committee a din nghal dawn a, hei hi NDA rorelna hnuaia issue hrang hranga lungruala an beih theihna tura hma latu tur a ni. Mumbai khawpuia inhmuhkhawmna neih leh hunah kimchanga tihfel theih beisei a nih thu Kharge chuan a sawi bawk a. Hei bakah hian INDIA coalition chuan New Delhi-ah common secretariat a din dawn bawk a, chu chuan campaign management an khawih nghal ang a, issue pawimawh bikah chuan committee hrang hrang din a ni ang.
Bengaluru inhmuhkhawmnaah hian Chief Minister pasarih – Mamata Banerjee (West Bengal), Arvind Kejriwal (Delhi), Bhagwant Mann (Punjab), Hemant Soren (Jharkhand), Siddaramaiah (Karnataka), M.K. Stalin (Tamil Nadu), leh Nitish Kumar (Bihar) te an tel a ni.
Anni bakah hian chief minister hlui – Lalu Prasad Yadav (Bihar), Sharad Pawar leh Uddhav Thackeray (Maharashtra), Mehbooba Mufti leh Omar Abdullah (Jammu and Kashmir), bakah Akhilesh Yadav (Uttar Pradesh) an tel a. Hruaitu langsar dang tel zingah Congress president hlui Sonia Gandhi leh Rahul Gandhi, Communist Party of India (CPI) general secretary D. Raja, leh CPI (Marxist) general secretary Sitaram Yechury te pawh an tel.
Opposition party meeting hmasa ber chu June 23 khan Patna-ah neih niin khatah kha chuan party 15 chauh an tel a ni.
Kharge chuan Prime Minister Narendra Modi leh BJP te a beihna chhunzawm zelin Modi chuan party kehdarh te chu lakluh a tum tia sawiin ‘opposition inlungrual hi a hlau a ni’ tiin a sawi.
INDIA do tur hian NDA chuan Delhi ah a thawhpui party 30 te meeting a neihpui zui bawk a. Kharge chuan, “Party 30 an tel chiah em ka hre lo, Election Commission of India a inziak lut an ni em ka hre lo. Chuti em ema party an tam pawh ka hre lo,” tiin a sawi bawk.