By Reuben Lalnunthara Hnamte
-- Advertisement --
Zofate hian Mizoram lo chu ram kan nei hauh lo mai. Ram leilung naupang tak leh hnam upa lo tak kan ni ti ila a sual awm lo ve. Kristianna a lo luh tan pawh kum 100 chuang awrh chauh a la ni a. Kan ram pawh ala thawlin, mihring chengte pawh kan la tam lo hle. Chutih lai chuan hnam thang chak angreng tak leh khawvel hriatna lamah pawh thang chak tak kan ni a. Kan hnam ala naupan ang aiin kan thang chakin kan changkang chak viau. Khawvel changkanna lamah pawh ram changkangte el phak khawpin incheina lamah leh social media lamah chuan kan thangharh viau. Chutih laiin Social media hman dan lamah erawh chuan kan la changkang tawk lo em ni aw ka ti thin. Miin Facebook leh hmundangahte thu an post a’ thenkhatin fiamthu nana lo hmang a, duh dah deuh tak taka lo comment duh tawk erawh kan ther fur mai.
Social media hi hmang thiam lo fe fe chu kan la kat nawk mai. Mi tam tak chu kan umphak loh changkanna hian min luhchilh em ni aw a tih theih. Thil reng reng hi a chawp te tea kal hi a fuh berna chin a awm. Khawi lai emawa mi harsa ve tak, khawsa ve tawk tawkte hian vawilehkhatah a vaibelchhe tel pawisa han nei thut mai se chuan an thatpui aiin an chhiatpui mah maithei. Mizo mi tam tak hi chuan teirei peihna hi kan tlachham hle a; zawite tea kal chhoh bek bek ai chuan vawilehkhata san thut emaw, hausak thut duhnate hian kan hnam hi min tihchhiatna chin a awm. Kan rama hnamdang rawn inhlawh thinte hi an fakawmna chin a awm khawp mai. In chhe tê an luah a, thawmhnaw mawl tak nen, hlawh tlemte inkhawl bek bekin, mawl deuhin an khawsa a, mahse, kum sawm te a lo vei chuan an ramah mi awmthei pawl tak an zu ni mai thin. Kan education system thleng hian kan thlak a hun tawh a, by heart system hi thlak a ngai tawh. School naupangte hian onwards aiin by heart hian mark an hmu tha zawk tlat te hi tihdanglam a hun ta hle mai. Phaia lehkha zir kan thalai thiam tak takte hian an thiamna hmanna tur an nei tlem hle mai te hi a rualawhthlak.
Mizo tam tak hi chuan chung chu kan peih lo va, hauhsak thut, len thut, changkan thut kan duh a, chu chuan min tichhe nasa em em a ni. He kan teirei peih lohna hian eirukna a ti hluar a, kuttling lova sum hai luh duhnate a pung nasa em em a ni. Mi tam takin politics ka khel an tih pawh hi ram an hmangaih vang ni lovin, anmahni hlawkna duh vang a ni fo. Sorkar hna, Politics, sumdawnna ah te hian therhlo beisei reng reng hian kan phe suau suau mai zawng a nih hi. Mi tam tak ringtu han inti ngam chi pawh hi kan ni meuh ang em maw? Mahni kohhran thiltih leh inkhawmnaah te inhmuam upa intih mitak ngawt hi ringtu tha tehna a ni hauh si lova. Kristian nun leh ringtu nun te hi a phurna lam ni lova, nuna lang chhuak tur zawnga inzirtir pawh hi kan tul ta khawp mai. Hnam dang tih dan tha lo kan lak fo na te hian kan hnam hi min tichhe nasa em em mai a ni.
Aizawl khawpuiah te hian duty awm lohna vantlang zuninah te hian zunna tlak a tlem hle; bawlhhlawh leh mihring ek hmu tur a tam thei hle, hengte hi kan khawpui nunphung a ni a, zahthlak tak a ni. Kan khawpui kawngdungahte ngei pawh chil chhak leh khak chhak te hmuh tur awm thin te hi a tenawmin a changkan loh thlak takzet a ni. Mizo mipui tam tak hi mahni inhmangaih tak kan ni emaw aw ka ti thin. Sorkar thil leh vantlang thilte mahni ta anga en duh hauh lo hi mi tam ber kan ni awm a sin. Kan ringtu nun inzirtirnate hi a phur so bulh bulhna piah lamah, kan nitn nuna kan zawm tur lam inzirtir uar hi a pawimawh em em a ni. A sawi lama sawi thei tak, khuang a rik hleka awm hle hle thei lo; sum leh pai leh thenawmte nena ramri chungchanga duham leh hle si te kan ni a. Mahni hlawkna tura khaw hmu miah si lo te kan kat nuk zawng a nih hi.
Incheina leh bungrua (material) inneih that siak lamah kan inel emaw tih tur a ni a, kan rilru lam changkang si lo hian. Sapram lam atanga lokal te meuh pawhin Mizoram incheina sanzia hi an sawi fo mai a ni. Mahni thawhchhuah phu lovin incheina kan uar a, lirthei lah kan uar bawk a, han belhchiana engmah ni uk si lo hian. Mahni hnampuite chawimawi hi kan tlachham a, chawimawi lam aiin rel chhiat lam hi kan uar emaw tih tur a ni. Hnamdang hote inchawimawi thiamzia han hriat hi chuan a rualawhthlak thin. Ram rorelna kawngah pawh hian kan hnam leh ram thanna leh changkanna tura theih tawp chhuah hi a hun takzet tawh. Kan ram leh hnam hi khi tah awm thei kan ni. Kan kalphung hi a fuh a nih chuan, state dangte leh ramdangte awh khawpin kan awm thei. Pathian zawnchhuah hnam inti ngam ngat kan nih ang hian Pathian duh dana kan ram leh hnam hi kan kaihruai a nih a, mipuite kan thanharh zel chuan Mizoram hi tun aia ram nuam leh awmawm takah a ding thei a ni.