Intodelh lohna….

‘Intodelh lohna’ han tih hian, a bikin ei leh bara intodelh lohna kan kawhtir bik ang a. Thildang a engahmah hian kan intodelh chuang lo va; ei leh bara intodelh hmasak phawt loh chuan thildanga intodelh hi thil harsa tak a ni ang.
UT kan nih phat atangin ram hruaitute thil tum lian tak pakhat chu ‘ei leh bara intodelh’ a ni a. State kan han ni leh a, ‘ei leh bara intodelh’ bawk kan thupui leh a. Mizoram Intodelhna Project (MIP) te pawh kan state sawrkar hian a lo kalpui ve tawh a, mahse project hlawhchham a ni a, tun thleng hian ei leh barah kan la intodelh thei lo.
Ei leh bar han tih hian a huam zau avangin, kan rinpui ber buhfai chauh thlurbing ta ila. Thingtlang lo neiha buh chin hi tunhma atang tawha kuthnathawktu tam zawk eizawnna pui ber a ni a. Kum tin ramngaw thiata eizawnna hian Vai buh kan chawkluhna hi a beng hniam phah reng reng lo lehnghal a. Ramngaw tichereu zawnga eizawnna kan kalpui ngar ngar chung hian kum tin Vai buhfai kan lei ngar ngar reng bawk a.
Kan rinpui ber buhfai tharchhuah kawngah hian, vai buh lei ngai lo hul huala buh thar chhuak thei dinhmunah kan ding chuang lova, kan ram leilung pawhin a daih hek lo. Chutih rual erawh chuan, leileta siam theih ram awl zau tak kan neih hi a nihna tur angin kan chhawr tangkai hlei thei lo erawh hi chu a manganthlak ta hle. Israel ramin thlaler ram ro pawh an ti hring thei tiin hahipin kan sawi a, keini a ram hring sa nei zawk hian, a letling thawkin ‘ram ro’ ah kan chantir ve thung dawn nge, shifting cultivation titawp tura hmalakna lah a kal chak thei reng reng lo a.
Hun kal tawh kha chu dah tha ta ila. Kan hma lawkah ram hruaitu tur kan thlang leh dawn a, eng sawrkar pawh lo piang se, ‘ei leh bara intodelhna’ hi tih takzetin buaipui thei tawh se a duhawm takzet tawh. Mizoramah mihring tlemte, Phai ram khawpui khawi lai thler hnih khat mihring pawh zat lo awmkhawm heti tak maia rethei reng renga kan awm hi a mualphothlak ti zawng pawhin a sawi theih awm asin. Ram hruaitute hian ram leh hnam hmangaihna tak tak thinlung an put a ngai takzet a ni.