By Dr. C. Lalrampana
-- Advertisement --
A KAMKEUNA
March 29, 2023 khan Lunglei Municipal Council inthlan vote thlak a ni a. Thil thar a ni bawka mipui pawh an phur thaw khat hle niin a lang. Mahse, rin lãwk aiin vote tla zat percentage kha chu a sang teh chiam lem lo. Zaah 80-85% vel tla tura lo beisei ruk laiin 75% chauh kha vote tla a ni ta a. Mipui an phur kim lo deuh a ni mahna! Mipui phur tlangin LMC hi nghakhlel tlang viau se’ng chuan vote tla zat percentage (%) hi a sang viauin a rinawm. Mahse, a tha thawkhat viau tho e.
LMC RESULT CHU?
Duan lãwk angin April 3, 2023 khan LMC inthlan result chu puan a ni ta a. Inthlan beihpui thlak laia Sorkarna siam inring theuh political party 4 insual an ni a. Abikin Sport Minister Pu RRR-a phei kha chuan video hmang meuhin MNF a sorkar turzia a sawi ni khan a lang a. Chutiang zelin ZPM; INC & BJP-te pawh Sorkar inring tak vek kha an ni. Mahse, rin phak bakin Zoram People Movement (ZPM)-in hnehna (absolute victory) changin indopui-II-na 1939-1945 laia khawvel hnam hrang hrang 90 lai inbeihna ang mai khan ZPM hian hnehna a chang a, thil mak ve tak chu a ni.
PARTY TIN AN LÃWM VEK
1. Zoram People Movement (ZPM)
Inthlan Result puan zawh a nih meuh chuan rin phak bakin ZPM-in hnehna a chang a. A then phei chu an lãwm uchuak mah mah tep a, kumin kum tawp MLA inthlan lo awm turah chakna chang zui zel tur ang hiala inngai nghalte pawh an awm dawn dawn a. Mahse, LMC hi MLA inthlan darthlalang a ni ngawt thei chuang lo tih erawh hriat a tha. An Working President erawhin pangngai takin lãwmthu sawina lehkha a chhuah a, a tihtur awm reng a ti a ni.
2. Mizo National Front (MNF)
State Ministry chelh lai tlin ngei ngei inring ni mah se, an artelukãwn thak mai a, thil mak tak a ni. Mahse, ZPM dawta an helhkam ber INC an artelukãwn ve tho avangin an lãwm ru viau tho niin sawi a awm. An chak loh erawh an pawm thlap a, an adviser-in thuchhuah a siam nghal bawk.
3. Indian National Congress (INC)
Chak inring ve viau mah se an artelukãwn ve tho. UPA an nihna anga an helhkam ber NDA -a an beih ber MNF & BJP an artelukãwn ve ve tho va, a ruk tak chuan an lãwm ve hle tho nia sawi a awm a, thil ni ve thei tak a nih hmel.
4. Bharatiya Janata Party (BJP)
Chak inring pha lo chungin political party lian central-a ministry chelh lai an nih bawk avangin huaisen takin inthlan an hmachhawn ngam a, artelukãwnin vote hmu tlem ber ni mah se, NDA anga an hmelma ber UPA/INC an artelukãwn ve tho avangin an lãwm ru ve hle tho nia sawi a awm bawk. Tak tak ni maw?
LÃWMAWM TA LO CHU?
LMC Result puan hnuah Party tinte an dinhmun theuh zelah lãwm viau hlawm tho mah se, thil lãwmawm ta lo ber chu Sorkarna changtu ZPM-in anmahni khalh ngiltu tur leh thurãwn tha pea finchhuahtu tur eptu pawl opposition bench-a thu tur a nei miah lova a hlanga sorkarna an chang ta hi a ni
Ram Rorelna ina eptu member thu ve tur an awm miah loh chuan an duh ang angin rorelna an kalpui thei dawn a, mipui huapzo sorkar a ni tak tak thei lovang tih a rin lawk thiam theih awm e. Dictatorship pawhin rorelna kalpui pawh ni se, hnialkalha siam tha tur pawl an awm miau loh chuan hmasåwnna scheme & project hrang hrang leh thawktu lak chungchangah pawh Nepotism a hnai nghal viau thei a, chuvangin, ZPM hnehna absolute victory hi lãwmawm viau mah se, eptu pawl tur awm lo leka party dang an artelukãwn erawh hi chu lãwmawm lo lai tak chu a ni e. Mahse, kalphung thar zuartu an ni a, rualkhai taka rorel turin beisei ngam phawt ila a tha awm e.
A TLÃNGKAWMNA
LMC result puan hnua Lunglei Mizo Hnam Runah chhung inkhawma thusawitu MNF Adviser Pu Lalruatkima khan, “MNF chuan kan chak lohna kan pawm a, insiam that nan kan hmang ang,” a ti a. MLA leh AMC-ah pawh a chak lo lam eptu pawl lian ber apiangin an chaklohna an pawm rualin insiamthat nana hman an tum thu an puang ziah a. Mahse, tun thlengin an insiamthat awm hriat tur a vang hle thung. MNF Adviser intiam ang hian insiamthat nan hmang dawn ta se, Covid-19 reh tawh lamah hian RT-PCR a bun tãk loh kha a bun thar leh dawn tihna em ni ang? Tin, Lunglei by pass road-siamna tur divert nia an sawi, Lunglei khawpui chhung kawng an siamnate kha an hnukkir leh dawn tihna em niang? Chutiang zelin Ministry-in Lunglei District a hlam chhiah leh a rep charna kawng hrang hrang an sawi thin te, HPC awmze nei lova kalpuitu ni anga sawite hi kumin MLA inthlanpui hun hma hian a siamtha leh hman ang em? tih chu chhut tham tak a awm niin a lang. Engpawhnise, insiamthatna atana hmang tura intiam thinte hian an intiam ang ngei hian insiamtha thin se a lawmawm ngawt ang.