Hmachhawp tam tak ka nei – K Vanlalvena

Rajya Sabha MP a nihna anga hma a lak tawhna a puitlin theihna atan leh kawng hrang hranga hmachhawp a la neihte a tihpuitlin theih nan Lok Sabha MP inthlanah vote turin mipui a sawm tih MNF MP candidate K Vanlalvena chuan a sawi.
Nilainia MP inthlan campaign kharnaah K Vanlalvena chuan, Rajya Sabha MP a nih laia hma a lo lak tawhna hrang hrang chhunzawm tur tam tak a awm a. Chhimlamah kawngkapui hawn a nih ngei theihna tur, border trade a puitlin thuai theihna tur, Zofate humhim kan nih theihna atan, state thenawmte nena kan ramri buai chungchangah leh thalaite hmasawnna atan theihtawp chhuah zelin, hmachhawp tamtak a nei tih a sawi.
“Hma kan lo lak tawhte avangin mipuiin min vote duh ngei ka ring a, ka beisei a, ka ngen bawk a ni. Eng dinhmunah pawh ding ila, ram leh hnam, kan sakhua tan theihtawp ka chhuah zel ang,” a ti.
MNF Election Campaign Directorate chairman Tawnluia chuan, enchhin ngai lo, kan hriatchian sa, hnam hmangaihtu, ram leh hnam leh kan sakhua a him theihna tura House chhung leh pawna au ngam, mi huaisen Pu K Vanlalvena kan nei chu a lawmawm, tiin, “Kan hnam inhungbingna ILP humhim turte, Zohnahthlakte thlavang hauh zel turte, border trade hlawhtlinna atante vote ang u,” a ti.