Hmahruaitu Argentina chak Brazil talbuai chhunzawm zel

Hmahruaitu Argentina chak
Brazil talbuai chhunzawm zel
Thawhlehni South American World Cup qualifiers thlirkual thuak thuak ila.
Argentina 1-0 Peru
Lautaro Martinez-a goal khung hmangin Buenos Aire-a Estadio Mas Monumental-ah Argentina hian sikhat faiin an mikhual Peru an hneh a; he second half goal hmang hian Inter Milan striker hian Diego Maradona goal thun zat nihrualpuiin, an ram tana goal khung hnem pangana a kai chho.
Martinez hian second half tan atanga minute 10 an khelh tlin rual chiahin ram tana a goal 32-na a puitlin a; he goal hi captain Lionel Messi chhawpsak a ni nghe nghe.
Inkhelh banah Argentina goalkeeper Emiliano Martinez chuan Copa America champion lai kan ni a, qualifiers kal meka hmahruaitu kan ni bawk a, kan inchhuang hle tur a ni,”a ti.
World champion Argentina hian South America khawmualpui atanga 2026 World Cup khel tur zawnna kal mekah point 25 kawl chungin hma an hruai mek a, team 10 inelna standing-a point 20 hum chunga pahnihna luahtu Uruguay lakah point ngaa sangin, khelh 12-a point sarih bak la hlawhchhuak zo lo Peru chu table mawngphah luahtu an ni.
Tarlan tawh thin angin, he khawmualpui atanga a sang parukte hian automatic-in United States, Mexico leh Canada-te inthlentawm tur World Cup an khel pha dawn a ni.
Brazil 1-1 Uruguay
Salvador khawpuia Arena Fonte Nova inkhelah mualneitu team an chak zo lo leh a, an chak zo lo a ni satliah ngawt lo a, Gerson-a siphurh sutna goal chu an hlimpui tawk em em a ni!
He inkhelah hian Federico Valverde chuan mikhual hmahruaina goal khungin, first half inhnehtawk tak a zawh hnu second half tir lam minute 55-ah Real Madrid midfielder hian hla derh dawrh atangin Brazil goal lamah a chhuih kual phei ngawk a, Uruguay-in hma an hruai.
Mikhual lawmna erawhin a daih rei ta vak lo a, minute sarih a liam leh rualin Gerson chuan Uruguayan defence talbuai hlawkpuiin Brazil siphurh a sut a, kha goal kha Flamengo midfielder tan international goal a khung vawikhatna a ni.
Brazil hian hun tawp lamah chak tumin nawr na zual mah se hun remchang hmu Luis Enrique leh Raphinha-te chuan goal ban sirah an thawnchhuak a; inkhel tawp rualin home fans lamin an team khelmual chhuahsan tur hi an ‘boo’ khum hum hum!
A zawna draw result vawihnih an neih hnuah five-times World Cup winners Brazil hian point 18 hum chungin CONMEBOL standing-ah pangana an luah pha chauh a; point khat ve vein an chunga awm pahnih Colombia leh Ecuador an pha lo.
Inkhel dangah goal thun theihna hun tha vawi duai lo bawhpelh chungin Colombia chu an mikhual Ecuador lakah sikhat faiin an tlawm a; Bolivia ram angin Paraguay pawhin draw result an hawpui ve bawk.
Point 19 neiin Ecuador-in pathumna an luah chho a; vawihnih tlawm zawn Colombia chuan goal difference-a Ecuador an phak loh avangin palina an lungawipui rih a ngai.