Hmahruaitu Liverpool an chak zo lo

Inrinni zan khan English Premier League 2024-25 khelh chhunzawm a ni a, table chung lama awm pahnih Liverpool leh Arsenal an chak zo lo. Hmahruaitu Liverpool in huaisen takin tlawm an pumpelh laiin an mualah beisei phak lo Arsenal in goal an thun thei lo. Liverpool leh Arsenal an chak zawh loh laiin Nottingham Forrest an khel tha chhunzawm a, hnehna an chang ve thung.
Manager thar Arne Slot hnuaia khel tha, EPL leh champions league lama hmahruai kawptu Liverpool chuan Anfield-ah Fulham an mikhual. An mualah hun rei tak chhung tlem zawk ni chungin inlan bawk mah se team huaisen Reds in tlawm an pumpelh a, point khat hlu tak an hmu. Tlem zawk ni chungin Liverpool hian point khat hmuh hram an tum lova, point thum hmuh ngei tumin tan an khawh. Hei hian team huaisen an nihzia an lantir chiang viau a ngaih a ni.
Anfield a lenglut Fulham in bul an tan tha viau a, inkhel tan atanga minute 11-na lekah Andreas Pereira chuan hmahruaina goal a thun. Hma takah goal an thun vangin an phur viau a, minute 17-na lekah Liverpool defender Andrew Robertson hnawhchhuah a nih vangin an phur leh zual sauh bawk. Goal thun hmasa zawk an nih bakah tam zawk an nih vangin Fulham tan Anfield-ah point thum hmuh theihna hun tha a inhawng.
Si phur zawk leh tlem zawk ni bawk mah se Liverpool in huaisen takin an khingpuite an nawr a, ball chang tam zawk an nih bakah hlauhawm pawh an siamchhuak fo. Na taka an khingpuite an nawr rah an seng a, second half tan atanga minute hnihna lekah Cody Gakpo chuan goal thunin an si phurh a sut. An si phurh an sut vangin phurna leh inrintawkna sang zawk an nei a, an mikhualte an nawr na hle. Na taka an mikhualte an nawr laiin an chesual nawn leh tlat thung. Fulham tan hian Rodrigo Muniz chuan minute 76-naah hma an hruai letna goal a thun a, an chak mai a rinawm hma viau.
An mualah an hnufual nawn leh hnuin Reds in team huaisen, team namai lo tak an nihzia an lantir nawn leh a, beisei dawng hauh lovin an mikhual an nawr. Hun tawp dawn hnaih minute 86-naah Diogo Jota chuan goal thunin an si phurh a sut nawn leh, Jota goal thun hnuin goal dang a luh belh thei tawh lova, Liverpool chuan an mualah tlawm pumpelhin point khat an hmu. An mikhual Fulham lakah chak zo lo mah se Liverpool hian table-ah point ngain hma an la hruai tho thung.
Inrinni zana inkhel dangah Arsenal chu an mikhual Everton nen goal awm lovin an inhnehtawk. An mualah an chak zawh loh vangin Gunners hian pathumna luah chhunzawm tho mah se, Chelsea nihrual a, Liverpool hnaih lehzual theihna hun tha an neih an chhawr tangkai zo lo.
Team lian Liverpool leh Arsenal in hnehna an chan zawh loh laiin season kal meka chetha tak Nottingham Forrest chuan harsa takin an mikhual Aston Villa an hneh a, Manchester City lehpelin palinaah an inhlangkai.
Nottingham Forrest hi an mualah goal an chhuah hmasa a, Villa tan Jhon Durán chuan minute 63-naah hmahruaina goal a thun. An mualah hnufual zawk an nih reng hnuin Nottingham tan hian Nikola Milenkovic chuan minute 87-naah goal thunin an si phurh a sut a. Hun pek belh minute 90+3 naaah Anthony Elanga chuan chakna goal pawimawh tak a thun a, an mikhual Aston Villa hnehin point thum an hmu zui ta a ni.
An mualah an chak leh tak vangin Nottingham Forrest hian khelh 16 atangin point 28 an hmu a, palinaah an inhlangkaiin Manchester City an lehpel. Pathianni zan khan Manchester City chuan Manchester United an hmachhawn. City hian United lakah tlawm an pumpelh a nih chuan Nottingham Forrest hi panganaah an tlahniam ve leh thung ang.