Hmar leh ram lailiah khua a vawt dawn – IMD

India Meteorological Department (IMD) chuan India hmar leh ram laili chu khaw vawt takin a tuam dawn tih an sawi lawk.
Khaw awm dan tur sawi lawk a nih mek lai hian tun lai hian India hi a hmar lam leh Himalaya tlangdunga awm state-te chuan khaw vawt tak an tuar sa mek a, hmun tam takah khaw vawh lam chu a hniam zawngin a kal mek hlawm.
Thawhlehnia bulletin an tihchhuahah weather department chuan khua hi Punjab, Haryana, Chandigarh leh Odisha-ah Nilaini atanga Zirtawpni thleng a awm dawn tih an tar lang a. Rajasthan, Madhya Pradesh, Vidarbha, Jharkhand leh Chhattisgarh-ah pawh tun kar vek hian a vawt viau dawn bawk tih an tar lang.
IMD chuan ‘chhum lam khaw vawt tak’ hi ‘Uttarakhand, Punjab, Haryana, Chandigarh, Bihar leh Uttar Pradesh-ah Thawhlehni leh Nilaini; Delhi, West Rajasthan leh Madhya Pradesh-ah Thawhlehni; Rajasthan khawchhak, West Bengal leh Sikkim-ah Thawhlehni atanga Ningani leh Jharkhand-ah Ninganiah a ni dawn’ tih an tar lang a ni.
Khaw vawt vin tak bakah hian ram chhung hmarthlang, ram laili, khawchhak leh hmarchhakah zing lamah karleh Thawhlehni vel thleng chhum leivak a zing nasa dawn niin an sawi lawk bawk.
“Zing lama chhum leivak zing chhah tak hi Punjab hmun thenkhat, Haryana-Chandigarh-ah Nilaini atanga Zirtawpni thleng leh a hnu ni li chhung hmun thenkhat laia a thleng dawn a niu,” tiin IMD-in bulletin an tihchhuahah hian an tar lang a ni.
Jharkhand-ah chuan khaw vawt tak thleng tur avanga inrinna tihchhuah a ni a, Thawhlehniah pawh khan district 10-ah chuan 10°C hnuai lama vawt a ni hlawm tawh tih PTI news agency hnenah thuneituten an sawi.
Jharkhand-ah hian Garhwa, Palamu, Latehar, Lohardaga, Gumla leh Chatra te chu a vawh zualna niin ‘yellow’ alert tihchhuah a ni a, Zirtawpni thleng vel hi la vawt hle tura sawi lawk a ni.
A bul, West Bengal-ah pawh Thawhlehni khan an khawpui, Kolkata-ah chuan 10.2°C niin January-a a vawh ber ni a ni tih IMD chuan a sawi a. Weather department hian an state chhim lam hmun tam takah ni eng emaw zat chhung a la vawt hle dawn tih an sawi lawk bawk.
Kolkata-ah hian kum 15 kal ta chhungin January-ah 11°C aia a vawh tum hi vawi khat chiah, kum 2023 khan a thleng a, he mi tum hian 10.9°C a ni tih PTI chuan a tar lang.