Hmar Martyrs’s Day hmang

Hmar Martyrs Day Vawi 35-na chu Ningani khan Kolasib district Saiphaiah khawtlang huapa awmni khamin hman a ni.
Hmanpuitu Serlui bialtu MLA Lalrinsanga Ralte chuan Hmar hnam a parvul zel theihna tur leh hmar tlangdungin hmasawnna kan neih theihna atana an nunna hlu tak hlantu martar-te zahna chibai a buk tih a sawi a. Martar-te nunna hlu tak avangin Mizoram sawrkar leh HPC ten remna an siam theih phah a, Hmar mipui duh Sinlung Hills Council (SHC) pawh kan nei theih phah tih a sawi. Hmar hnam chu Zohnahthlak zinga thang duang ber pawl an ni, tiin, an thiam an finna chu Mizoram leh Mizo hnam tana hmang zel turin a chah a. Chi intihbingna awm lo se a duh thu a sawi bawk.
Remna leh muanna a awm loh chuan hmasawnna a awm tak tak theih loh avangin remna leh muanna a hlu hle tih a sawi a. Zo hnahthlak hnam hrang hrang tawngte humhalh a tul rualin, kan inpumkhatna atana kan tawng hman tlanglawn Lusei tawng erawh thiam tlan a tul tih a sawi a ni.
Hmar Martyrs Day hmanna hi NC Hills Indegenous Students Forum president David Keivom bakah Assam-a Zohnahthlak zirlai hruaituten an rawn telpui a ni.