Hmarchhak huap thiamthila intihsiakah Mizoram tha ber

Hmarchhak huap thiamthila
intihsiakah Mizoram tha ber
Sawrkar laipui Ministry of Skill Development & Entreprenuership buatsaih, IndiaSkills Northeast Regional Competition 2025- 2026, Guwahati-a neih zawh takah Mizoram team chuan gold medal 9, silver medal 3, bronze medal 3 leh Medallion for Excellence 6 lain hmarchhak state champion an ni.
Regional Skill Competition hi January 19-22 ah Guwahati University-a neih a ni a. Trade hrang hrang inelna 26 awmin, Mizoram Team hian trade 20-ah inelna an hmachhawn a ni.
He competition hi hmarchhak state hrang hrang thiamna leh kutchhuak fiahna hmunpui a ni a. Mizoram team hlawhtlinna hian Mizoram thalaite kutchhuak leh thiamna chu hmarchhak state-ah chauh ni lo, ram pum huap pawhin a sang hle tih a nemnghet, tia sawi a ni.
Mizoram aiawhte hi LESDE department-in 2025 December 8-12 chhunga Mizoram Skills Competition a buatsaih kaltlanga thlan an ni a. Northeast Regional Skills Competition-a winner, gold leh silver la te hian India Skills Competition, national level-ah Northeast Region ai an awh anga, an tih that dan azirin World Skills Competition leh Asian Skills Competition-ah India ai an awh ang.
Mizoram team hian electronics, fashion technology, floristry, hairdressing, hotel reception, painting and decorating, restaurant service, retail sales leh visual merchandising-ah gold medal; floristry, mobile application leh software category-ah silver medal; bakery, restaurant service leh software-ah bronze medal an la a; Medalion for Excellence hi cooking, beauty therapy, electronics, graphics designing, painting leh hairdressing-ah an la a ni.