Hmarchhak rural bank ho zinga sum chevel tam ber Mizoram Rural Bank

India hmarchhak state rural bank ho zingah Mizoram Rural Bank chu an hnathawhna kawng hrang hrangah a tha ber pawl a ni.
Mizoram Rural Bank Annual Report 43-na, 2025- 2026 sawrkar kum chhunga hma an lakna chu Thawhtanni khan larsap Gen. Vikay Kumar Singh (Retd) chuan a tlangzarh a. Annual Report-a tarlan danin, 2025- 2026 sawrkar kum chhung hian MRB chuan sum chevel, deposit leh loan pek chhuah cheng vaibelchhe 10,656.08 a nei a, kum hmasa aiin zaa 11.26 in a tam a, hmarchhak state rural bank zingah a tam ber.
Hlep (net profit) cheng vaibelchhe 152.27 hmuin, hmarchhak state rural bank zingah pahnihna a ni a. Bank branch tin sum khawih zat – Business per Branch (BpB) cheng vbch. 100 aia tam nei thei India ram rural bank pali zingah telin, BpB vbch. 100.53 a nei tling. Thawktu pakhat zel sum khawih zat BpE cheng vbch. 21.70 a nei pha a; India ram rural bank zingah pahnihna niin, hmarchhak state-ah pakhatna a ni.
Sum chevel zinga zaa 97.36 chu digital financial transaction niin, hmarchhak state-a titha ber leh India ram pumah pahnihna a ni a. Credit- Deposit (CD) Ratio zaa 63.29 neiin, hmarchhak state rural bank-ah pahnihna a ni. Pradhan Mantri MUDRA Yojana hnuaiah DFS target zaa 154 thleng phain hmarchhak state rural bank-ah a sang ber a ni.
Mizoram bank zingah loan pe chhuak hnem ber niin cheng vbch. 4129.98 a tling a, sum dahluh dawng tam ber dawttu niin vbch. 6526.10 a ni. Sawrkar scheme pawimawhah hmahruaitu niin Mizorama Pradhan Mantri Jan Dhan Yojana hnuaia account zaa 78, Pradhan Mantri Jeevan Jyoti Bima Yojana-a inziaklut zaa 56, Pradhan Mantri Suraksha Bima Yojana-a inziaklut zaa 53 leh Atal Pension Yojana-a inziaklut zaa 43 chu MRB hnuai ami an ni.
Heng bakah hian, khawtlanga dawmkan ngai zual tan loan pe chhuakin self-help group zinga zaa 95, National Rural Livelihoods Mission hnuaia zaa 90, National Urban Livelihoods Mission-a zaa 79, Kisan Credit Card scheme-a zaa 67, MUDRA-ah zaa 29 leh Prime Minister’s Employment Generation Programme-ah zaa 27 chu MRB kaltlanga loan pek an ni.
Report-a a lan danin, Mizoram Rural Bank hi ‘scheduled bank’ niin, Mizorama bank inzarpharh zau ber a ni a. District tinah inzar pharhin branch 106 leh thawktu 491 a nei. Bank branch awm lohna hmunah business correspondent (BC) dah zelin BC 350 chuang an awm mek a. Kolasib-ah Mizoram Rural Bank RSETI a awm bawk.
Larsap chuan, Mizoram Rural Bank-in kum dang zawng aia hmaa Annual Report a peihfel leh hmasawnna hrang hrang hmuh theiha a awm chu lawmawm a tih thu a sawi a. Mizoram thingtlang kiltin dapchhuaka awm MRB chu thingtlang sum leh pai dinhmun innghahna pawimawh an ni, tiin, mipui tana duan central scheme hrang hrang, education loan leh social security scheme tam zawk pek chhuah leh tihhlawhtlin kawngah theihtawp chhuah turin a chah.
Mizoram chu chhiah luh tlemna, revenue deficit state a nih avangin chhiah lakluh kawngah tan lak a tul a, thingtlang sum leh pai dinhmun (rural economy) tihhmasawn chu hemi atana pawimawh tak a ni tih a sawi a. Loneitute thar chhuah hlawk zawka hralha sum lakluh tipung turin market linkage tha ruahman a tul tih a sawi bakah inzirtir tam a tul tih a sawi.
MRB hotute chu credit deposit ratio tha leh NPA awm lo siam tura tan la chhunzawm zel tura chahin, NABARD leh MRB chu hmasawnna ruhrel tha zawk siam tuma theihtawp chhuah turin a fuih bawk.