Hmarchhaka solar park lian ber
Vankal Solar Park hman theih ta
Sawrkar laipui Ministry of New & Renewable Energy (MNRE) leh Mizoram sawrkar tangdun siam nizung chakna hmanga kawlphetha mega watt 20 pe chhuak thei Vankal Solar Park, North East-a hmasa ber leh lian ber chu Thawhlehni khan Power & Electricity minister R Lalzirliana’n a hawng.
P&E minister chuan Vankal Solar Park puitlin a nih theih nana ram petu Vankal khawtlang chhuanawm a tih thu a sawi a. Solar Park chu hawn fel ni tawh mah se, a venhim leh enkawl zui zel kawngah neitu thinlung pu chhunzawm turin a fuih. Hrileng avanga hna a khaih lak hnuah department leh hnathawktuten theihtawp an chhuah leh, sawrkar hmasa atanga ruahmanna awm tawh sawrkar tharin chhunzawma Vankal Solar Park hawn a ni ta chu lawmawm a tih thu a sawi.
Mipui tana kawlphetha hnianghnar zawk pek kawngah department chu theihtawp chhuah zel turin minister hian a chah a. Thawktute zingah awlsam taka sum leh pai siam tum an awm a, man chhuah an nih chuan an chungah dan anga hma lak zel tum a ni tih a sawi bawk.
Lengteng bialtu MLA Dr L Thangmawia chuan a bial chhung Vankal khuaa North East-a Solar Park lian leh hmasa ber tur hawn a ni chu lawmawm a tih thu a sawi a. Mahni khaw bil tan nilo, Mizoram tana malsawmna ni tura an khaw ram tha lai phal taka petu Vankal khawtlang fakawm a tih thu a sawi.
Vankal Solar Park hi state sawrkar sum, nuai 1707 leh Ministry of New & Renewable Energy sum, nuai 400, a vaiin cheng nuai 2107 senga din a ni a. Civil work thawhna’n cheng nuai 272.38 sen niin, electrical work thawhna’n nuai 1834.77 sen a ni. 2018 August-ah lungphum phuma bul tan niin, hrileng vangin hna a khaihlak a, a zawh hun tura ruahmanah zawh hman a ni lo. Kumin February 16 khan hlawhtling taka trial commissioning tiin, March 18 khan commercial operation tih tan a ni.
Vankal Solar Park-ah hian power lakluh leh pekchhuahna tur 232/33 kV Sub-Station leh Control Room bunfel niin, hmundang atanga power lokal nen thlunzawm a ni anga, Mizoram puma hman theih tura ruahman a ni. Ram acre 144-a zauah solar plate/ module 52453 bun a ni a. Heng bakah hian inverter 113, Inverter Control Room 7 leh Main Control Room 1 a awm.
-- Advertisement --
# Solar plate bun hna hi solar developer pahnih – M/s Sunfree Northeast Renewable Energy Pvt. Ltd. leh M/s ATA Renewable P4 Pvt. Ltd. ten an thawk.
# Sunfree hian power Mw 15 siamna tur buaipuiin, ATA hian power Mw 5 siamna tur a buaipui thung. Hawn a nih hnu kum 25 chhung enkawl hna company-te hian an thawk chhunzawm dawn a ni.
# He Solar Park atanga power siamchhuah hi Mizoram sawrkarin man tlawm zawkin Rs 3.94/ unit-in a lei thei dawn a. Tunah hian phailam atanga lei aiin unit khatah cheng khat aia tam zel state sawrkarin a hum thei a ni.
# Chhinchhiah danin Vankal Solar Park hian April 25 khan a chak lai berin power mega watt 19.06 thleng a pechhuak thei a ni.