Tuichang lei thar hawng
Central Roads Fund leh Scheme Special Assistance to States for Capital Investment (SASCI) sum hmanga sak Keitum -Artahkawn Road, Tuichang lui chunga Mizoram PWD-in lei a dawh chu Thawhlehni khan chief minister Zoramthanga’n a hawng.
Tuichang lei hawn tak chu Tuichang ral chhak leh thlang inkalpawhna pawimawh tak a ni tih chief minister hian a sawi a. Lei dawh hmasak chu metric tonne 10 chauh dawl a nih avangin lirthei lian leh rit zawk an kal theihna tur lei lian mamawh a ni a. Lei thar dawhnaah harsatna eng eng emaw an tawk tih a sawi. Lei design thlak a ngai a, Central Roads Fund atanga sum hmuhah wingwall atan provision siam a ni lo a, sawrkarin thawh zawhna tur sum SASCI atangin dah belh a ni tih a sawi a ni.
Tuichang lei dawh hi double lane BUSG girder bridge a ni a. CRF sum nuai 754.75 bakah SASCI atangin nuai 259.45, a vaiin nuai 1014.20 hmanga sak niin, senso zat erawh nuai 1010.53 a ni thung. PWD hian contractor atan Sadguru Engineers & Allied Services Pvt. Ltd. Guwahati an hmang a, lei hi metric tonne 100 dawl zo tura duan a ni.
A tira ruahman anga dawh tum chu lei bulthut siamnaah harsatna an tawk a, foundation siam hna tihtawp lailawk niin, mithiamte rawnin ruahmanna thar siam a ni a, a laiah ban awm lo (single span) dawh tura tih a ni a, a siam dan thlak a nih avangin revised estimate pawh siam a ni.
Ruahmanna hmasa ang chuan lei hi 2018 December 1-a zawh tura tih a nih laiin, lei dawh dan hmang thlak a nih hnuah 2019 December 1-a zawh tum a ni a, chhan dang hrang hrang avangin kumin March 31 ah khan zawh a ni ta chauh a ni.
Tuichang lei thar hawng
Get real time updates directly on you device, subscribe now.